今日既行程係要行Cradle Mountain，所以我地決定晌park度食個豐富既早餐先出發，煮左兩個公仔麵，煮左尋日剩返既腸同食埋芝士蛋糕，咁早食呢d野結果當然好飽，但最好都係帶定少少野食去Cradle Mountain，以防萬一。
遊園卷晌vistor center果度買，成人day pass $16.5，架車可以泊晌個停車場度，然後坐佢地既shuttle入園。
對於我地呢種到處一遊既懶惰鬼黎講，我地當然揀一條最唔辛苦既路黎行，睇過書同埋center既介紹之後，我地決定行Dove Lake Circuit，應該係最多人行既一條路，介紹都講係老少咸宜既步行徑，路程大約兩個鐘。
坐shuttle坐到最尾果個站，果度有個registration既地方，純粹係俾人寫低d資料，萬一夜晚收左之後見你仲未出返黎，佢都可以聯絡返你。
圍住個湖行，行到邊都係山明水秀既風景畫。今日天氣好，所以一路行一路影d相既效果都唔錯，唔同既角度影出黎都幾靚，同埋始終都係响山區，都幾大風，所以見到d雲既變化都幾快。
對於行慣好多路既我地黎講，本來以為呢度老少咸宜既circuit應該唔係好甘，但行落就覺得都幾累，而且上山落山，明明係圍繞個湖既路線，但係佢又會兜路，我地幾乎無休息咁行，結果都要行左近兩個鐘頭先行完，行到一半真係有一種洗濕左個頭既感覺，擺明就係一條不歸路。
行到差唔多最尾，終於見到cradle mountain既正面。如果你時間充足，帶d飲品食物慢慢行，又坐下又抖下其實都唔錯既，只係我地有少少趕時間，所以比較辛苦。
前後我地差唔多行左兩個半鐘先離開Cradle mountain，立即就要趕去Ross，車程又要行兩個半鐘有多，而且又係山路，所以趕都無用，最後要五點幾先去到Ross。
點解要趕去Ross? 就係為左呢間Ross Bakery同魔女宅急便既踪跡，間餅店就係Ross市內既既林蔭大道之中，但去到果間Ross bakery已經閘左門。
好在鬆弛不甘心的等一陣，終於有一位應該係店主既男人出黎開門，我地問下可唔可以買takeaway，佢好好人咁俾我地入黎慢慢揀餅，又俾我地四圍影相，仲要邀請我地去影果個舊式焗爐，真係好感激佢呀。
呢間麵包店其實係宮崎駿果套魔女宅急便，裡面果間麵包店既藍本，入面有果隻貓既公仔同畫冊，仲有d日文字添。
我地買左提子餅同一個咖喱帶子批，男人仲送多一個蔬菜批俾我呢。塔斯曼尼亞既帶子雖然肉身比較細，但十分鮮甜，另外d批皮做得十分薄同脆。
Ross呢個小鎮雖然細，但十分漂亮，大街都俾樹林包圍，係大街行過令人心擴神怡，而兩邊既主要建築物都有好統一既英式有風格。
離開Ross就開車番去第一日到Tasmania落腳既最大城市Hobert，住番係第一晚到埗Tasmania住既Barilla park。今晚突然心血來潮想打邊爐，結果真係坐言起行，去左超市買左d蕃茄、粟米、菜、牛肉、羊肉同埋蝦返去campsite打邊爐，簡簡單單用個亨氏罐頭加d蕃茄粟米整左個湯底，準備得最辛苦係d肉類，因為買返黎係一大塊，要切薄片，而我地既刀又唔夠鋒利，所以切得好辛苦，最後順利打到邊爐，不過返到香港都係要再打一次正宗先得啦。
今晚係最後一晚晌Tasmania，呢個地方的確係幾舒服既，風景都靚，又多海鮮食，不過我地一致認為依家留五日剛剛好，最多都只係留多一日去埋北面既Devenport同Burnie，再留多幾日好似太多，始終我地都唔係特別鍾意行山既人，而訓車既夜晚真係一個非常好既體驗，因為老左應該冇咁既魄力，所以都值得試下。
Cradle Mountain
Ross Village Bakery
15 Church Street, Ross Tasmania 7209 Aus
15 Church Street, Ross Tasmania 7209 Aus
Barilla Holiday Park
更多最新的飲食資訊在我的Facebook page，請給我一個’LIKE'吧！
0 意見:
張貼留言