迷你.黑洞

Happiness Real only when shared.

功夫潮菜 : 滿樂潮州


限聚令雖放寬左,但大家都似乎習慣左四人一檯,今晚既潮菜飯局就湊夠四人,順便見見成年幾兩年都無坐埋同檯食飯既朋友吹吹水食下功夫潮菜

食潮州野先黎杯功夫茶係常識。

正菜之前通常都係拼盤先上,滷水鵝肉拼盤有鵝片、豆腐、墨魚、豬腩肉同滷水蛋,冇入鏡既豆腐入口有豆香,鵝片雖合格但自己都係鍾情鵝件,所以覺得二奶角色但肥瘦相間既豬腩肉先至係最好。

潮菜湯水中既鹹菜豬肚湯係我飛佛之一,一來煲到軟嫩既豬肚十分吸引,二來呢個湯既鮮味同胡椒既香係絕配,一人得一碗有啲唔夠喉。

蟹黃脆皮海參伴柚皮賣相討好,又紅又綠加埋表面微焦入面軟彈既海參同火喉十足食落無渣既柚皮真係冇得輸。

胡椒粉絲蟹煲上檯前煲蓋冚到實一實,一打開胡椒味撲面而來,蟹肉鮮甜加上胡椒味焗到曬蟹身同粉絲,呢個菜式食到最後係見到煲底。

潮州蠔烙煎得金黃而蠔烙厚度平均,要有呢個效果就要煎而唔係炸先會上碟咁薄身靚仔,加上食落香脆有蛋香同蠔鮮,下次再黎呢碟都會encore。

龍鬚子母中蝦用左蝦膠包住中蝦而成,蝦膠雖味濃但就無中蝦既口感,所以兩樣野走埋一齊令蝦味更濃而口感更實在。

糖醋伊麵有人當佢係鹹點又有人當係甜品,自己就冇乜點分,唔雖要花考而整到呢個咁香脆好食就得。

反沙芋係香港愈黎愈少見,一來唔係貴價野,二來整一份就成隻鑊俾溶左既糖槳黐實即刻唔用得,而且要洗都幾麻煩,三來呢個甜品唔易整得好,講到尾整呢味野都幾吃力不討好!早幾年記得有間潮菜餐廳雖然肯整,但都要個晚冇咁忙兼接近收爐時間先可能會接單,所以係個度食到食唔到要睇彩數。今晚呢度就無呢個問題,而出品既糖衣厚度雖唔算好平均,但入口熱度、芋頭粉既程度同糖衣跟芋件既黏合都不錯。

潮菜呢啲老牌菜式雖然唔係大熱菜式,但功夫潮州菜自有佢存在同欣賞既價值。


滿樂潮州

地址:尖沙咀彌敦道132號美麗華廣場一期食四方4樓405 號舖

Tel : 2157 9949

日式居酒屋氣氛 : 本店 Izakaya by K


成年幾去唔到旅行既日子,大家都係度諗一有得飛會去邊食咩,唔使諗日本肯定係大家既熱門選擇之一,不過諗得太多都冇用,所以有機會就搵食友試下日本野最實際。 

季節針魚刺身先上檯,肉質爽口也有不錯魚味,配上酸汁魚味更突出。


玉子燒一上已吸引到大家既目光,食落夠滑又夠蛋汁已經收貨有餘。

新鮮豆腐皮伴海膽係鮮甜跟豆香既混合出品另黑朴葉味噌燒日本豬腩肉每片都切得夠厚,肥友相間的肉片入口既有油香又富肉香。

白蜆五色燒有創意但味道普通。

鯛魚昆布燒效果唔算非常好因燒得耐左,鯛魚有dd過熟不過食落都算嫩滑


松葉蟹甲羅燒淨係睇到覺吸引,係檯上即燒即食既甲羅,入口都係蟹膏既香甜同蟹肉鮮味。

黑豚肉卷溏心蛋既汁個人覺得有點偏甜,不過甜d既汁可以平衡油膩又可以突出蛋黃同豚肉味。而免治雞肉棒咬落爽口,配埋蛋黃醬一齊食都係冇得輸既配搭。


廚司發板壽司6件比較一般,壽司飯有d實淨似乎可以做得更好。


左邊既一品吉列和牛每件份量不少,外面香脆食落入面仍有肉汁。另日式烤飯糰未食已聞到燒烤香氣,食落外層香脆又有一點飯焦,令人不自覺成個食曬。

焙茶焦糖燉蛋入口香滑兼茶香不俗,食完燉蛋上面既綠茶蛋糕因太飽所以等其他食友攪掂

店內既環境係有日本feel,都似日本既居酒屋,去唔到日本既黎感受下日式居酒屋既氣氛都唔錯


本店 Izakaya by K

地址:將軍澳唐俊街18號The Parkside第一座地下G07

Tel : 3618 8211