早一晚食飯時，住係Sydney既朋友不斷游說，叫我地唔好去Blue Mountain，佢覺得我地去旅行主要都係為左食野，Blue Mountain唔特別又冇野食，要花四個鐘頭火車來回好似唔太化算，而我地留晌悉尼既日子唔算多，佢話如果時間充裕既先考慮去，不過商量過後，都覺得點都要去下，最多下次有機會再黎悉尼先食多d，而唔再去景點。
早餐我地特登早d起身，去左一間叫Le Monde Cafe既地方度食，係响Central station附近，大約向斜路上行5至10分鐘左右，晌書仔果度介紹話有egg benedict既早餐，所以想去試下。
果度好多人黎買外賣，如果堂食既話搵個位坐低，佢就會俾個menu你。早餐選擇都唔少，不過因為我地趕時間，所以只係要左一個egg benedict加煙三文魚，另外仲點多左個Yoghurt with granola頂住先。
Egg benedict加煙三文魚先到，上面既荷蘭醬落得夠重手，蛋汁流心又富蛋味，十分好呀。另個Yoghurt with granola就普通左d，但granola就好飽肚。
去Blue Mountain最好係搭早上9:09晌Central開出果班，因為岩岩off peak，買return tic一人都係大約Aus$11，大概11:10就可以去到Katoomba，跟住人潮出左火車站之後，d人會堆晒去買explorer bus果個舖仔度，如果你都只係打算遊覽一下，就無必要買呢個pass，因為成三十幾蚊。
晌火車站出口行過對面馬路，再向前行，晌一間酒店既門口就有一架686既巴士，成人一程$2.1，可以去到Echo Point同Scenic World，係最平價遊藍山既方法。網上好多人都話去左Scenic World先去Echo Point，我地就跟住呢個方法，先去左Scenic World，而第一個寫住Scenic world果個站係唔岩既，第二個先係，因為第一個果度要買一程玻璃底既cable先可以坐過去Scenic World。
到左Scenic World先要乖乖排隊買上落山既ticket，ticket有幾種選擇，叫Discovery Options，而其實俾多$7就可以坐cableway來回，但係我地只係買左valley return $21，先搭一程54度斜既railway落山，跟住指示行十分鐘，中途有d舊礦洞同工具睇下，之後再坐返cableway上山，整個旅程就咁完左了。
本來係要跟住網上既人講再坐返巴士去Echo Point，不過最後一刻我地發現Echo Point其實都係睇果個Three Sisters石，而晌Scenic World其實已經睇到，可能只係無咁近，所以最後都直接坐返一程巴士出返火車站就算。
網上有人提到Katoomba前一個站Leura都幾靚，見火車時間都岩，我地就坐火車去果度行下睇下。
呢度既火車大約都係一個鐘頭一班，搭左去Leura，行下又飲下咖啡，差唔多逗留一個鐘剛剛好，又可以搭下一班火車出市區。基本上由Katoomba去Leura果程火車係要俾錢，收$3.4澳幣，不過唔知有冇人查飛，上上落落都可能冇人理。
晌Central火車站又向山上行，大概十幾分鐘會去到一間老字號fish n chips店叫Mohr Fish，外賣會平過堂食好多，叫fish n chips可以唔要chips，轉mash potato或者salad都得，賣$9.5都可接受。
買完之後再向前行多一個街口，對面就有一個Eddiw Ward公園，果個公園仲有野餐檯，唔使講最適合就梗係食fish n chips啦，所以我地將呢個公園改名做Fish n Chips Park!
炸魚好好食，d魚肉好嫩，炸漿夠薄又夠酥脆，跟魚既tartar醬都好夾味，最好既當然係唔駛食薯條，因為呢幾日已經食唔少，人都薯左唔少，而且食菜感覺健康好多。
之後去左Capitol Square既Passionflower食甜品，朋友話其實呢間野有好多間分店，而我地就去左唐人街附近果間，雪糕外賣唔可以坐檯，睇過menu之後我地坐低，叫左一個芒果口味既gelato加刨冰一齊食，大約$12.5，價錢唔平，而且唔係特別好食，可以唔試。
因為食左太多餐西餐，而聽日晏晝都已經訂好檯又食西餐，所以今晚想食一d的唔同既野，朋友就帶左我地去一間馬拉野叫Mamak，食飯時間好多人排隊，不過流動速度快，所以我地都只係等左二十分鐘就有位。呢間野係澳洲攞左一頂帽，即係類似米芝蓮既一星咁。
呢度主要係食roti，即係馬拉薄餅，有唔同既餡料，本身薄餅已經跟左兩個類似咖喱既汁，所以唔一定要再叫咖喱既main course。我地點左一個紅洋蔥roti，味道唔錯，不過香港都可以食到咁既水準既薄餅。
另外重有咖喱魚，馬拉咖喱香料味唔重，帶少少酸味，可能有少少似亞參咖喱，唔算話非常驚喜，但都幾重口味，特別係裡面吸左咖喱汁既茄子、蕃茄同秋葵都幾辣。至於舊魚就冇食，亦唔知係咩魚品種，鬆弛話魚皮勁腥，所以我都唔敔食，可能配雞、蔬菜會好少少。炒通菜很香口，不過偏鹹，好似泰式炒會好味d。
因為怕夜左會肚餓，係食甜品之前都要叫多個椰漿飯頂肚，呢個椰漿飯就冇咩特別，有d椰香但配菜既魚仔都幾好食。
最後叫左一個好似一座塔既甜品，配一個雲呢拿雪糕球，個塔其實係頭先果款鹹薄餅既麵糰拉出黎既，好薄好脆，裡面加左唔少糖，所以都幾甜，而且份量唔細，兩個人吃會有d吃力，我地三個人都只係剛剛好完成得到，雖然甜但真係幾好食，又香又脆，係今日既完美結局。
～By 鬆弛～
Le Monde Cafe
83 Foveaux Street, Surry Hills Sydney NSW Aus
Blue Mountains Australia
NSW Aus
Mohr Fish
202 Devonshire St, Surry Hills NSW Aus
Passionflower
Shop G12,Capitol Square/730-742 George St, Haymarket NSW Aus
Mamak (Haymarket)
15 Goulburn St Sydney NSW Aus
0 意見:
張貼留言