[澳洲．塔斯曼尼亞．墨爾本] 澳洲新婚之旅 (Day 12)

今朝一早又去到Hobart市區果度食早餐，除左Mures之外，仲有一間睇左要去食既就係Fish Frenzy，印象中d人講話唔係好貴。我地叫左一個Fish Frenzy，包兩塊魚，三個魷魚圈同埋三粒帶子加大量薯條，$17，正常價錢，不過呢度所有醬都要額外收費，一小盒$0.5Aus，最後我地都買左兩盒，如果唔係食落會好乾。炸魚同我地晌悉尼食果間差好遠，呢間好乾，炸魚又唔滑唔好食，魷魚圈同埋帶子就正常，總之點樣都係要配醬先好食少少，呢d錢唔慳得。

本來我地係打算去Bruny Island食生蠔，但係我地睇錯google map，以為有橋可以開到島上面，但原來係要搭船，一架車來回要$30，大概一個鐘頭一班，船程20分鐘，但由於我地食完野已經將近12點，由Hobart市區開落去碼頭要45分鐘，所以最快都要搭1:45分果架船，應該趕唔切5點晌機場還車，所以最終放棄。改變行程第一步，首先都係晌Hobart市區行下，因為上個星期六行完個market就走左，都未真正咁行過個city。市中心都算有少少野行既，又有少量特色建築物，應該都可以消磨到個幾鐘。

今朝一因為去唔到Bruny Island食蠔，所以我地只好轉左近Hobart果間Brailla Bay食生蠔，果度聽聞好多旅行團去，晌樓上餐廳食即開生蠔一打$21，dressed既就$22，有好多唔同口味俾你揀。

最後我地揀左一款咩Barilla Bay's special既口味，其實係酸汁配上煙肉碎，味道有少少搶，味道無問題，只係好似食返正常生蠔好d。

樓下有平既已開殼生蠔，一打有埋檸檬同醬既要$16，可以晌室內食，如果想外賣，盒裝既開殼生蠔只係$11.9，但係裡面無檸檬又無醬既。因為晌個盒裡面開唔到黎睇，所以唔知係點樣。最後我地買左一大盤，大概有三十隻，包檸檬同兩款醬就$39。其實醬要唔要都罷，一款係泰式食蝦餅果度酸辣醬，同生蠔完全格格不入，另一盒係Tobasco，但係好辣，又係搶晒蠔味，果度單買一個檸檬好似都係$0.7，唔介意可能買幾盒$11.9再加一顆檸檬仲好。

食完生蠔我地就去左附近既Richmond，果度係歷史悠久既小鎮，小鎮非常細，可能半個鐘多少少就行完，不過都幾靚既，反正離機場都只係10公里以內既路程，都可以一去。

而晌去Richmond既B31公路上面有一間The Wicked Cheese Company，裡面有brie軟芝士賣，之前去過兩個有賣芝士既地方都係得hard cheese，所以見到有soft cheese好開心，而且仲可以試食。

最後我地買左兩款soft cheese，佢地有好細包既包裝，最平可以去到$2.5一小塊，都值得買黎試下。

準時五點鐘去到機場還車，還車好順利，好快就攪掂，其實佢地驗車都好hea，兜個圈望幾眼就算，而我地租果架車其實係有miles限制，本身應該只可以開900km，之後每公里$0.03，超過150km就當租多一日車咁計，即係大約$38，其實一開始係有unlimited miles可以租，不過我地晌google計過又好似唔過900km，結果我地一共行左1150km，只係還車既時候驗車小姐又無理到，之後都有charge返信用咭。

我地班機本身係2015去Melbourne，但係因為架車要5點還，所以我地早左好多去機場，一開始仲傻更更咁話要晌機場坐三個鐘，其實應該係可以搭早一班機，但我地果一刻記唔起，5點還車，5點5有同樣有班機去Melbourne，如果我地知道再早0的去機場還車既話，或者我地可以搭車一班，咁就唔駛晌機場白白浪費三個鐘。

到左Melbourne機場，一出去就見到skybus，十分鐘一班，好方便，好似去到夜晚十點都有，但係星期日就好似六點幾就無，穩陣都係上網睇一睇時間先。單程$17，來回好似係$28，不過因為我地最尾兩日會租車，所以只係買單程。

今次租果間Miami hotel網上面既評語幾好，我見有人話行去CBD都唔算好遠，因為佢夠平，所以就訂左，但係其實都比我想象之中遠，唔知係咪因為天氣凍又大風，所以覺得都幾遠，好在有架電車可以去到酒店附近，唔想行既搭電車都仲得。本來想訂double room，點知得返twins都照殺。間酒店無樓梯，但係只得兩層高，行都唔算辛苦。房比較細但都算乾淨，房裡面有洗手盆、雪櫃、電視同風扇，廁所沖涼房同廚房都要share，整體設施都唔錯，最岩budget traveler，因為咁平真係唔容易搵。


一早知道落機咁夜，所以上網搵定宵夜地點，好多人都話唐人街有，同埋有一街希臘野，但唐人街咁夜仲開果既都係食中式小菜，做宵夜又太過重口味，仲有另一間又係食pancake既，同第一晚係Brisbane類似，所以我地又無食，怕夜晚食太多澱粉質好濟，最後我地去左一間叫做家家樂既蘭州拉麵店。

十一點幾，客人都唔少，買外賣既人更多。

我地叫左一個辣子雞丁飯同埋酸辣湯麵，都等左三四個字先有，始終呢度既節奏都係無香港咁快，如果要等碗麵都等幾個字，係香港已經發左火。個飯同碗麵超級大，個飯係平常香港size既1.5倍，碗麵幾乎可以用窩黎形容，完全係外國人既份量，所以$9.5真係唔貴，早知咁大淨係叫一個分享就算，依家我地要好努力先食左九成。本來對味道無咩期望，因為當時已經太肚餓，只係想食d野，但實際味道的確比想象中好，所以如果想搵又平又抵食，都可以考慮黎呢度。

Fish Frenzy
http://www.fishfrenzy.com.au/ 

Barilla Bay
http://www.barillabay.com.au/ 

 The Wicked Cheese Company
http://www.wickedcheese.com.au/index.php

Miami Hotel Melbourne
http://www.themiami.com.au/ 


家家樂蘭州拉麵店
地址：175 Russsell Street, Melbourne

https://www.facebook.com/pages/%E5%AE%B6%E5%AE%B6%E6%A8%82%E8%98%AD%E5%B7%9E%E6%8B%89%E9%BA%B5-Melbourne/342864182579926 

更多最新的飲食資訊在我的Facebook page，請給我一個’like'吧