唔係玩玩下：荔園茶餐廳 Lai Yuen Restaurant

荔園已經係icon，也是一代香港人的集體回憶 ，而家懷舊當時興，所以今日收工就來尖咀既荔園茶餐廳坐坐。

門口係代表荔園標誌的老虎仔在迎客，室內有旋轉木馬吊在天花營造下氣氛。

地鐵站出口雖近但最近天氣熱到hihi，所以坐底都係想叫飲野先。鮮菠蘿冰最懷舊既唔係味道，係要自己出力拎住半個菠蘿搾汁，其實以前飲菠蘿汁斷估都唔使咁辛苦先有得飲既，不過呢個gimmick都ok，話晒有新鮮菠蘿汁飲下，重可以DIY加多少少菠蘿肉都得。

食友飲完鮮菠蘿冰追加既黑牛，見佢飲得都幾快(其實佢好多野都好快...)，應該唔會差得去邊卦。

美國珍寶炸脾配豉油皇銀芽炒麵或薯角，以前應該未有薯角所以要了炒麵，但炒麵都係冇食，因為炸脾真係非常巨型，珍寶兩個字跟本唔足以形容佢有幾大隻，所以就算係大家share都要留肚食炸脾，而炸過既脾肉唔會乾爭爭，且入口都幾juicy同夠味，所以再大隻都俾大家ko左。

恐龍屋隻DINO在現在當然覺得佢個樣攪笑多個恐怖，不過DINO噴火咖喱系列好彩唔係恐怖出品，可以跟慢煮牛肋肉或香草煎雞扒，今次要左牛肉，咖喱唔係用咖喱粉開出既貨色，而咖喱夠濃所以牛肋條都入味，不過衰都要講句自己食到半條淋同半條比較硬既牛肋條，另外覺得薯仔最好食，入味得黎薯味好濃，心諗呢隻薯仔拎去做薯條或焗薯可能重正。

童年時外婆釀糯米烤雞原來有大廚既故事背景，不過今日冇八到個故仔，只係專心食野。可能係隻雞處理得好既關係，雞肉焗完都幾嫩滑，而糯米係雞肚內吸晒雞既原汁原味之餘，糯米入口又唔會撻成一塊，呢個雖然唔知當年係荔園有冇推出但都食得過。

焦糖溫泉蛋西多士，流心蛋永遠都吸引，不過小心唔好成隻蛋未食就飛左落街，唔好以為我講笑，當晚臨走就見有客人幾乎出事，差d未食就表演溫泉蛋西多走蛋。

可能有人會話食物其次而回憶無價，不過我會話只想食老本既話，係香港呢個咁現實既地方應該好快GG，似乎店家都明白所以出品都唔係玩玩下。

荔園茶餐廳 Lai Yuen Restaurant

地址：尖沙咀加連威老道12-16號加連威大廈地下12號舖

電話：3598 3088

更多最新的飲食資訊在我的Facebook page，請給我一個like