行過路過唔好錯過： JEP by Involtini

平日放假既日子都會睇下大西北有冇餐廳cafe值得去行下睇下食下享受下，今日兩丁友就貢左入屯門良景個邊既cafe食左個tea，起身閃人個時大約５點９過d，打開個map想睇下附近有咩餐廳就睇到JEP by Involtini幾近，銅鑼灣個間已經食過印象唔錯，既然咁近咪行過去睇下，去到先知有walk-in位又未有人排就無啦啦排左第一，就係咁今晚既晚餐決定係度攪掂。

雖然係大西北但店內都有唔錯既裝修。

頭盤既酸種麵包同黑麥麵包微暖入口香脆。

都係想食左蔬菜先食主菜，就叫左個水牛芝士蕃茄麵包沙律，蕃茄仔十分多汁而芝士奶味濃，加左落沙律既醋汁幾醒胃。

冇記錯松葉蟹甲羅燒蟹膏意大利飯每晚都係限量供應，睇過相覺得幾對版就叫左。

上檯時店家都介紹左呢碟野用左蟹湯、蜆湯、松葉蟹油蟹肉蟹膏去做同埋要由外食到內。意大利飯口感偏硬但呢種口感先正常，另飯粒已吸收左海鮮湯，所以食落有陣陣既鮮甜餘韻，如果以為外面既飯粒已經夠濃味就真係少年你太年輕啦，中間舖左甲羅既米飯既有海鮮味，再加埋蟹膏既轟炸，一食即刻覺得原來外面個既米飯只係小菜一碟，中間既超濃蟹膏味先至係大絕。

食完意大利飯見個胃冇咩投訴，就叫多個傳統卡邦尼手做意大利麵，呢度既出品講求正宗，所以上檯時店家已話冇落cream。

果然一入口只有蛋香撲入喉嚨，跟住食到意大利麵既al dente，食食下又會有porchetta既油香滲出，呢d有層次既感受唔係咁易係出面食到。

到左呢一刻甜品真係食唔落，話曬我地５點９重係cafe消滅緊最後幾條薯條，到左而家真係要鳴金收兵，希望下次黎可以有新菜式試下。

睇報導先知大廚以前係8½ Otto e Mezzo BOMBANA主理手製意粉，唔怪得出品有料到。呢度既出品係睇得又食得之餘，有心做又有質素，價錢唔算平但一定係值回票價，難怪網上訂位長期爆滿。

JEP by Involtini

地址：屯門良德街8號珀御地下G05號舖

Tel : 3482 9883

預祝9周年 : Jaselab Cookery

飯要日日食，但當被迫食屋企飯食得太多，正常既人都會想食下好西，搵個藉口出去食飯，而諗藉口呢家野有時都幾頭痕，遇著唔係你我他她既生日月份，又唔近個堆乜節物節既話，真係冇乜藉口可以擺上檯，既然係咁小弟今次就決定早左半年，用左慶祝9周年呢個似係唔係既藉口，同另一半衝出九龍去元朗食好西。

未食頭盤先食麵包，包夠熱辣辣其實已經贏左一半，重要包皮香脆入面軟熟，加埋parma ham既咸香襯托，結果係驚住食包食飽左既陰影下，都係要食晒個包。

頭盤係蕃茄同蕃茄加蕃茄既沙律，幾隻唔同色既蕃茄原來黎自荷蘭同日本，食落堅清甜又冇草青味。

蘑菇湯出黎只係見到一碗黑色既水，原來係因為湯如其名只用蘑菇去整湯，冇加任何忌廉之類去煮，但你唔好理佢有加乜冇加乜，總之飲落去就好似幾碗水煲埋一碗水既feel，蘑菇味真係濃到爆燈。

呢碟主菜最初睇以為係意大利飯，原來係北海道帶子同西班牙紅蝦既切粒，加埋蝦膏同紅糖自製既醬汁整成，海鮮同膏香係口中打交既感覺真係唔講得笑。

重未計上面個隻刺身級既鮮甜大scampi，成碟野真係超重料。

威靈頓牛柳應該係呢度既主打，因為網上好多相都係呢味，咁即係冇理由黎到唔食。

主菜威靈頓牛柳上檯，一睇就知火喉岩岩好。

牛肉已經過dry-aged 除左肉味濃左，自己覺得另一好處係當你點既火喉如mediun rare既話，正常切開舊肉點都會流出肉汁，咁既話個酥皮就好易會化開同濕左影響口感，而家呢舊dry-age雖然都係medium rare但就冇乜肉汁流出，所以塊酥皮仍然係酥皮而唔係淋皮或謝皮，亦因為咁小弟將半邊再切一半後，兩邊都冇散開，舊肉就可以企係度靚靚仔仔咁影番呢張相。

另外要講用左兩個鐘煮既蒜頭好鬼正入口即化，重有細細個既法國薯仔層外皮夠薄又整到好似酥皮既口感。

最後甜品上場，當然要連埋食呢餐飯既藉口一齊影下相。

Jaselab Cookery

地址： 元朗安樂路1-11號明珠樓地下11號舖

電話 : 冇喎

前日本領事家廚主理 : 三原 鐵板燒 Teppanyaki Mihara

一段時間冇食鐵板燒，今晚就約左兩位都住得近既食友，一齊去將軍澳呢間三原鐵板燒。

黎之前睇左資料，知道大廚三原先生以前係日本駐美國芝加哥領事館擔任總領事既首席家廚，在任幾年間除左為總領事煮野，亦都會為來自世界各地黎既客人烹飪日本料理。

部份蔬菜類食材已整齊擺好等大廚出手。

前菜既螢光魷魚簡簡單單但入口鮮甜，日式蒸蛋食落夠熱蛋漿好滑。

大廚在準備黑毛和牛肉西冷薄燒時，見到西冷既油花幾靚，燒好後加埋配菜一口一件，入口油香十足，雖然幾邪惡但點都食曬先算。

輪到海鮮食材同配菜準備出招。

煎好既北海道銀鱈魚朴葉味噌燒睇落都幾吸引因，銀鱈魚肉裡面既魚油似乎好飽滿，煎過後魚油都都流曬出黎包圍住成舊魚肉，食落果然係油香滿口，再沾d可以突出魚味既味噌，轉頭大家已得番塊吉左既葉。

香燒原隻大海虎蝦跟意粉真係冇用錯名，隻蝦真係幾大，而意粉吸收左大蝦汁即刻升呢，煎好既蝦肉亦入口夠彈。

特選宮崎A4和牛西冷見到塊肉已令人流口水。

燒好既和牛內裡仍肉質粉嫩而外面就香口，大廚切成大約一舊一啖，食既每一舊放入口一刻，口中既油同肉味都令人好滿足，再加入鹽或胡椒提味又係另一種享受。

經典蒜蓉炒飯米粒分明，而大廚既炒飯雖然冇乜其他配料，不過炒好滲出既飯香已夠叫人自動成碗食曬。

麵豉湯同醬菜都不過不失，布甸同意大利芝士蛋糕都入口幼滑。 

以往想食鐵板燒一般都諗去尖沙咀，唔係就過海去銅鑼灣，而家使出尖咀唔使過香港，係將軍澳都食到似樣既出品。

三原 Teppanyaki Mihara

地址： 將軍澳唐俊街18號The Parkside第一座地下G06號舖

Tel : 3618 8212

日式燒 x 懷石概念：焼肉而今 by 富小路やま岸

喜歡日本菜的朋友，應該都聽過2021年獲得米芝蓮榮譽的懷石料理店富小路，近來在同一商場開了新副線的本格燒肉店「燒肉而今」，趁新開張還未有太多人，找了個平日來試試午餐。

這裏提供的肉類都由日本當地直送，是最高級的A5和牛，並且大部份都由來自擁有過百年歷史的「日山畜產」提供，質素有保證。

與一般日式燒肉店的裝潢不同，單邊落地大玻璃採光度高，加上淺木色的和式設計，感覺光猛開揚。

午市套餐選擇都不少，由燒肉到壽喜燒，以至拌飯和烏冬定食都有，價錢由$180起。不過這裡最有名是A5和牛又怎可能錯，就選了$480極上A5黑毛和牛燒肉盛合。

燒爐有一個特別之處就是利用蚊香型的發熱線，火力會比一般的更平均，更適合燒肉。

燒肉套餐會附上沙律、茶碗蒸、前菜、泡菜、白飯。沙律伴以帶酸香的柚子醋汁，開胃的同時亦可解茶膩；碗蒸裡面加了蟹肉，入口滑溜；前菜有紅蘿蔔煮牛肉粒，味道帶點甜甜的。

盛合包含了四款不同部位，包括上肋、背身、肩胛和牛柳薄片，脂肪分佈略有不同，另外還有紅薯和舞菇。

剛才也有提到因為爐的設計火力會較平均，牛肉燒出來的網紋特別漂亮。

四個部位各有特色，肉味最濃郁的當然是牛肋肉，不過個人就最喜歡肩胛肉，而牛肉夠薄每邊只需輕輕燒三秒即可。牛肉入口軟嫰，油脂分佈平均，入口帶豐富的油香脂但亦不過份油膩。再配一口白飯超級滿足。

甜甜的紅薯亦相當美味香甜，當作是甜品之一也不過份。

最後附上可可Mochi甜點作結尾。

後來再看不少網絡上的評論，大部分人都是來試晚市$1280十道菜和牛Tasting Menu，食物種類多之餘更有和牛海膽菜式，看來相當吸引，有機會也想訂檯試試。

焼肉而今 by 富小路やま岸

地址：尖沙咀梳士巴利道18號Victoria Dockside K11 Musea6樓603號舖