安排今次旅程只因miles到期，結果就決定快閃台北三日食下行下就好。
三日旅程就買三日捷運pass加來回機場車票。
去到旅館放低行李，出發行去食台北第一餐。
二屋牡蠣拉麵算係步行範圍內，去到門口已有人在等位。
等到就有位可以係門前坐低等入座，店家亦會叫客人先買票落單。
叫左鹽味同醬油濃厚牡蠣拉麵各一，另加一碗叉燒飯就好。
麵同湯都可以追加十分貼心。
叉燒飯唔算大碗，飯面部份叉燒經過炙燒幾香口。
叉燒配埋飽滿飯粒同食係不錯既享受。
主角濃厚牡蠣拉麵上檯。
麵身有咬勁亦都掛到湯，不過兩款湯底比較下覺得醬油湯既牡蠣味比鹽味更濃。
三隻飽滿牡蠣都做到野，有著不錯既鮮蠔香。
叉燒肥瘦相間入口軟熟。
配菜中最突出係十分香甜既燒洋蔥片。
食完拉麵見到不遠處有條小人龍，原來係排隊買COOKIE886既出品。
睇資料呢度原來係2023全台烘焙大賞TOP30名店之一。
見有時間就買盒原茶綜合當手信。
食過正餐就去同一條街既灑白甜。
買下鮮奶麻糬當甜品。
一片片既奶香麻糬入口煙韌非常，瘋狂沾上店家既花生碎加芝麻糖粉既沾醬粉都唔會太甜。
食飽係時候番去Just Inn正旅館check-in。
房間偏細，唔係太多地方掛衫或放行李。
好在廁所乾淨同花灑夠力出水都夠熱。
門口有攪怪poster同影相機消磨時間。
招待處隔離電梯門係入口，由電梯另一邊門一出就係大廳。
其實行過少少右邊都有通道入大廳，唔使係部電梯都出出入入咁攪笑。
幾年冇食過詹記，幾飽都想再食佢地既麻辣湯加鴨血豆腐。
未到晚餐時間所以係飽住食，叫半份翼板牛加半份松阪豬就好。
點知做會員有特價梅花豬一整份。
白菊烏梅湯好飲，白菊茶香同烏梅酸甜都平衡得唔錯。
太多肉要點個茼蒿食下，個樣同香港既唔似但食落一樣味道。
翼板牛同梅花豬比較瘦，松阪豬多一點油香。
最期待既麻辣湯同鴨血冇走樣。
鴨血軟嫩入口即滑入喉嚨，吸收左麻辣湯既豆腐都好食，不過鴨血太好所以比下去。
食到好飽要散下步，就行去臨江街觀光夜市落格。
點知行到街尾見到紅花麻辣鹽水雞。
都係忍唔住買左鹽水雞脾加3個配菜。
睇落門口冇乜客人原來已經好多單等緊，俾左錢拎左籌都要等15分鐘先有，最後行番酒店先慢慢嘆。
雞脾肉幾乎無脂肪偏瘦但有雞味，配菜都爽脆，不過小辣食落都幾辣。
休息到9點左右再出動。
經過已列為市定古蹟既臺北郵局同西門町就順便打下咭。
宵夜第一站先去焦糖楓串燒西門店試下串燒。
一入門就見到所有串燒。
隨心揀幾款菜類，再加幾串牛豬羊肉同雞翼試下。
揀好串燒坐低等食。
等十幾分鐘就有得食，串燒都帶點焦糖香甜。
個人覺得最好食係烤麻糬及筊白筍，前者煙韌後者爽脆。
食完串燒本來想搵酸辣湯，點知去到小店見到今日冇開，轉頭去左阿財虱目魚肚食粥同煎虱目魚。
呢度既野都係即點即炒即煮，所以要等下先有得食。
煎蔥蛋唔會太燶，蛋身厚實有蛋汁。
魚肚粥內魚肚鮮嫩，粥底帶魚鮮，就算唔落胡椒粉都唔會有魚腥。
金黃色既煎魚肚睇落吸引，食落魚肉亦真的煎得香脆及有魚油香，雖然唔平都值得一試。
台北市中正區重慶南路一段1號3樓
02 2371 8230
台北市大同區赤峰街35巷11號
台北市中山區民生西路66巷25弄1號
02 25317886
台北市大同區南京西路25巷38號
02 2559 1011
台北市大安區和平東路三段60號
02 2377 7799
大安區臨江街
02 25505220
大安區臨江街103號
02 2706 6838
忠孝西路1段118號
02 2720 8889
萬華區成都路46號
0975 852 693
萬華區內江街53號
886 2 2370 3378
0 意見:
張貼留言