大熱天時店員都十分賣力在店外招呼客人值得嘉許。當日去到都等左20分鐘先可入座。
新店比舊店大而座位都多左接近一倍，點餐紙都大同小異，主打都係個幾款口味。
上年係屯門奇蹟拉麵食左原味同清湯醬油拉麵，今日就試未食過既烏賊濃味拉麵。當日係屯門食之前只知極多好評，但冇睇評論內容，所以完全係自己食後感。
今日亦唔會理新店及烏賊拉麵既評論，咩都係假自己食一次最真實。
上檯就係一碗烏黑色拉麵唔會認錯。
湯頭夠熱味亦十分濃，但飲多幾啖就覺得偏鹹。
麵條仍有咬口，掛湯效果也不錯，不過烏賊湯比較杰身，所以更易吸附在麵條，如果係清湯醬油拉麵的話，應該可更易睇清楚麵身掛唔掛湯。
叉燒都軟熟但肉味不算濃郁，舊店做得較好。
半熟蛋交到貨，入面十分流心。
第一次試新店同烏賊拉麵感覺有好有唔好，亦冇左當初係屯門食既驚艷，可以說是奇蹟不再。不過應會搵日食多次清湯醬油拉麵，比較一下水準同味道跟舊店有冇分別。
地址：旺角通菜街22號達明大廈地下
營業時間 1200-1500 1800-2200 (售完即止)
0 意見:
張貼留言