迷你.黑洞

Happiness Real only when shared.

2022韓國自由行自駕遊第三日 全州 光州 (魷魚黃荳芽湯飯 溫談 英美鴨肉湯 良洞炸雞)

 

第三日會留係全州食早餐同午餐,下午直落光食晚餐同留宿一晚。
一早起身見到藍天白雲,順手影下呢間韓屋同外面環境留念。
住韓屋都雖然出入會麻煩少少,要係室外除鞋著鞋同飲水要去common area,但係一個唔錯既體驗。
今朝先去全州市場試下首爾鄉巴佬第九集到訪既全州市場魚黃荳芽湯飯,店家只開朝早六點到下午兩點。
全州市場周圍都有好多地攤。
擺賣各式蔬果同冰鮮海鮮。
市埸入口附近已見到唔少攤檔在售賣新鮮黃荳芽。
餐廳在入口不遠處。
餐牌極簡單,就係黃荳芽湯飯

今朝雖然全場爆滿,都係等左幾分鐘就有得食。
前菜先到。
黃荳芽湯飯跟蛋同可加紫菜。
當地人係將湯撈落隻蛋度一齊食左先。
湯飯好足料,個湯除左落黃荳芽同加左個飯外,重落左好多好多魷魚肉去煮所以好重魷魚味,食個陣重可以加紫菜增添風味。
冬天一早有碗熱湯落肚,食完成個人即刻暖曬,同埋先有力量繼續周圍去。
今日天氣好,食完湯飯又行下街。
再去Kakao Friends睇下同行下市集,睇下有咩手信同野食買下。

附近都有好靚既紅葉。
呢邊都有遊人換韓服遊下街影下相,亦有人帶埋寵物一齊出遊。

到左中午時間,本來想試非常有名既全州伴飯,話曬都去到全州應該試試,但最後決定放棄呢個韓國國民美食,搵左呢間溫談온담
因為前一晚已發現呢間係navar既排名非常高,尋晚經過又見到全埸爆滿,所以決定放棄伴飯而食呢間。
店家有自家停車場。
餐廳只用炭火而主打只係豬肉。
呢度既豬肉係唔食唔知幾好食,一食就知真心番唔到轉頭。
豬肉肉質除左軟熟,燒完重有炭香,咬落去有豐富肉汁,肉味亦愈食愈濃,味道口感同香味都有驚喜,亦驚覺韓國豬肉可以有想像以外既水準
除左炭火豬肉,呢度既紅麴牛油煎蛋飯都係好野。
用左食全州伴飯既quota食呢餐都完全冇後悔。
食完滿意既一餐,下午開車直落今次旅程最南既光州。
五點幾左右到埗泊好車check-in。
酒店reception冇人本來都唔出奇,因為之前既中小型酒店好多時都冇人係reception,一敲鍾仔就有人出現,但呢間就敲極都冇人出現,等左十分鐘先有位大叔行出黎攪check-in。
酒店幾新淨,間房乾淨又夠大。
重有部係廣告見過既韓國牌子消毒乾衣櫃玩下。
放底行李就去試鴨肉湯,呢間英美鴨肉湯係首爾鄉巴佬第四集到訪過之一既餐廳。去到發覺人氣旺盛,要等幾分鐘先可入座。
店家咭片同餐牌。
店家先上爐具、前菜同蔬菜,
蔬菜個樣就似通菜但其實係水芹菜,食落味道有d似皇帝菜。
鴨肉湯色水同濃度似足沙爹湯,重要係5碗水煲埋一碗水既濃度,不過飲落唔會太鹹,有少少藥材同鴨肉味道,飲完一碗重feel到個身暖左,真係有d料到喎。
湯入面既鴨肉唔少重幾大件又多肉,食落完全冇鴨肉膻味,感覺有d似食緊雞肉。
鴨肉同加左蘇子葉粉既辣醋醬係出奇地夾。
因為鴨件真係又大又唔少,食完鴨肉同碟菜已經夠飽,而吸左湯既水芹菜都好惹味。最後飲多啖湯暖下身就正式收工。
番到酒店休息一陣,轉頭就行去光州市內行下睇下燈飾。
光州市中心都有地下步行街,如果天氣太凍可以落黎行下。
宵夜就預左去光州良洞市場,食下已經有五十年歷史既元祖良洞炸雞,除左係首爾鄉巴佬第4集既餐廳,亦係白鐘元老師節目到訪過既炸雞店。
今晚都幾凍,過左晚餐時間已經冇咁多客人。
咩都唔使諗炸雞唔該。其實呢一刻個人重飽緊,鴨肉未完全落格,不過唔想太夜食宵夜。
一坐山咁既炸雞轉頭就出現,見到個一刻覺得未必食得曬。
不過好食既野係會叫得醒個胃同食慾既,個炸雞真係好食,炸醬唔算好薄但夠貼又夠脆,唔會一咬就散開,雞肉juicy食落都唔覺太油。
最後都叫食得曬唔使打包,可解油膩既醃蘿蔔同提升肉味既醬汁都應記一功。
如果鍾意炸雞又想搵宵夜既話,呢間炸雞係宵夜之選,再到光州都一定會再訪。

전북 전주시 완산구 풍남문2길 63 2동 74호
063-282-7214 

전라북도 전주시 완산구 다가동2가 181 1층
010-8977-4958

광주 북구 경양로 126
062-527-0248

광주광역시서구천변좌로262번길 1-1
062-364-5410


0 意見:

張貼留言