等了又等終於有得飛，今次目的地係韓國，雖然由仁川落機，不過今次會直接南下。
落機拎車就直接去忠清北道既清州，第二日由清州去大田市再落全羅北道既全州韓屋村留宿，第三日由全州去全羅南道既光州，第四日上番全羅北道海邊既群山市食海鮮，同日再上仁川留一晚再回港，由北向南再上番黎都唔會入首爾。
租車方面兩個月前一早預訂左Lotte，店方早幾日都有email confirm班機同時間。
韓國高速公路可以用Hi-Pass去俾錢，可以問租車公司有冇得安排Hi-Pass咭同部機，但俾錢要用當地銀行戶口或當地credit card先可用，或者拎張咭去便利店入deposit但用剩既錢冇得退還。大公司既車內GPS通常都十分準確同夠update，開車前試曬點入韓文地址或地點名就上路。
到左仁川隨便搵個parking lot泊好架車買少少野食同試下用外國credit card俾泊車錢，結果係V字頭既card俾到錢開閘。
呢間OTTO飯卷店冇放係行程入面，因唔想用太多時間再泊車搵餐廳而試下，攪到去到清州時太夜。
不過飯卷睇落靚仔食落都幾好，米粒分明蔬菜脆口午餐肉又惹味。
食完飯卷見到大大間LotteMart就順便入去行個圈買野飲。
順手買少少香港未見過既拉麵同杯麵當宵夜。行完就直落清州去棗樹家食晚餐。
棗樹家係清州都有名氣，因為韓國名人白鍾元老師既節目都到訪過。
小店格局。睇唔明既餐牌就用google translate或papago轉番中文或英文就得。
轉左就係咁，有d轉完都會怪怪地但都估到既。
見到前菜已經夠肚餓，湯未到已不停食前菜同煎蛋。
見到滾住既豬肉泡菜鍋更加餓，湯汁好夠味帶濃濃泡菜香。
可能因為太餓，今餐半個鍾左右就完成。
完成棗樹家就去清州Dubai Hotel check-in。
呢間酒店既房除左房大個電視都大重係弧形個隻睇波一流。
坐一陣再出發去今晚第二場既燒肉餐廳。
餐廳位於清州一步行街內，呢度其實叫五花肉一條街。
我地見最多人食個間就入去試下。
肉類得三四款選擇，坐底就開定爐叫五花肉同豬頸肉。
坐低叫完野就會送上一堆配菜。
個爐一邊暖住泡菜，另一邊就燒住豬肉。燒肉既野燒得夠香口就冇唔好食既理由。
食飽要落格，搵左間附近收得夜既Homeplus行個圈。
兜下行下買下水果後，都係要早d番去休息，抖足精神第二日落大田同全州。
清州棗樹家
충북 청주시 청원구 사천로18번길 5
清州清原區斜川路18號街5
清州五花肉一條街
清州市 上黨區 西門洞 150-12
청주시 상당구 서문동 150-12
0 意見:
張貼留言