快點過去 : 念川居 Chuan Palace

早排香港既疫怖情係三月頭好似穩定左少少，大家都忍唔住即刻約飯局，今晚就先人少少四個食友一齊黎呢度飯聚。

小食以為點了炸豆腐，原來係招牌脆皮一口血旺，外皮果然做得脆薄，而裡而既血旺不會一咬即散有點口感。

前菜的蒜泥白肉肥瘦相間，蒜泥不太搶口份量都剛好，而白肉切得夠薄，食入口除左有油香都有肉味。

今晚在席有食友不太好辣，大家就唔叫川菜名菜如口水雞而試下呢度既脆皮吊燒雞，燒雞對版外皮透薄又唔算太油，而火喉掌得得好所以雞肉剛熟，連比較嚡既雞胸肉食落都算滑。

西瓜食過唔少，但呢度出品既豉蒜炒西瓜皮就好少次見，西瓜皮清甜無渣，加入不常見既花生芽同炒，而外型似足巨型芽菜既花生芽都爽口，食落亦有芽菜冇既香甜及咬口，係除左綠色蔬菜外呢個都係值得一叫既菜類出品。

水煮牛舌是上次都有叫既菜式，今日都要再叫一客因為有食友未試過而自己都掛住呢個菜，今日雖然係小辣版，但厚切既牛舌除左好感更好，舌芯亦煮得夠淋又入味，加上其他入味配菜如筍片、青瓜、鴨血及寬粉，就算唔好牛舌都會被其他配菜吸引。

食中餐點都要點個蔬菜類菜式，感覺先冇咁邪惡，魚湯鮮腐竹浸時蔬既腐腐竹入口有豆香，而自己最鍾意其實係魚湯，有齊腐竹時蔬加魚鮮既味道。

自己出街食飯比較少機會點豬手菜式，不過眼前的黃酒豬手煲上檯時聞到有點酒香，襯熱食的話香味重濃，而豬手都煮得入味，外皮已熟透又吸收左酒香，所以最後都食多幾件先滿足。

甜品等食友發板，結果今晚點芝麻味不錯，外表黑漆漆既芝麻卷食落唔算太甜又有濃濃芝麻味。

食過呢餐香港既疫情又突然多左個案，希望疫情快點過去，呢種日子可以快點過去。

念川居 Chuan Palace
地址 : 旺角太子道西193號MOKO新世紀廣場5樓501號舖

電話 : 2339 1900