車仔麵唔算心頭好，可能因為車仔麵同米線都係類似既野，我地通常都會去左食米線，好少一心一意想搵車仔麵食，今次呢間就因為夜晚坐車經過左幾年，見到一路都幾多人幫襯，某日發現佢係對面開左舖就過黎試下。
入面都係茶記格局。車仔餸主打都係滷水出品，如果唔like滷水既人可以慳番唔使試。
因為唔太肚餓，所以只叫一個四餸河粉,再加一個涼伴生腸就好。
某人要多茜，結果舖頭另上一碗。
四餸係蘿蔔、牛筋、牛腩同牛肉餅。
蘿蔔雖然大舊但食落都夠淋兼幾夠甜。
河粉粗幼適中，唔係一夾就斷個種，入口食落都算滑。
牛筋同牛腩都入味又有不俗滷水香之餘，食落都無渣又帶點咬勁。
可能之前d滷水餸做得好，牛肉餅變左好似唔算好特別。
小食既涼伴生腸幾爽口，個汁好夠味又夠辣。
雖叫小食但碟頭唔細，兩個人不停食都好似食極唔完。
食完一碗粉一碟小食感覺都好飽，如果叫兩個粉麵應該會頂到上心口。出品有質素價錢又唔貴，兼且店家亦有出一分力幫助基層，有機會都想過多黎一兩次試下其他出品。
華記潮州滷水車仔麵
地址：太子界限街34號民興大廈地舖
Tel : 6563 3939
0 意見:
張貼留言