Good day入西貢 : 蔡農日籽 Good Day

四月中既其中一日長假期，當日天氣雖有雲仍陽光絢爛，good day既日子就走一轉西貢食過午飯。

早幾年一個月總會入西貢一兩次，而家少左好多因為怕人多更怕塞車，入去食同行下兩三個鍾，坐車塞車來回一樣可以唔見兩三個鐘。

今日係長假第三日，可能頭兩日已經有太多人黎左玩，今日感覺唔算多人又行車暢順。

呢度近甜品舖又係停車場對面十分易搵。

到埗都係得一檯客，隨心坐低後叫野。

叫左大蝦香蒜炒意粉同蕃茄煙三文魚意粉加杯有機茶，唔食咁多睇下一陣重有冇心水餐廳可以溝貨。

大蝦香蒜炒意粉出場一刻重有煙，入口夠熱意粉有咬口，食落意粉都吸收左蒜香。

另一個既蕃茄煙三文魚意粉冇咁好鑊氣，不過蕃茄蓉幾香甜，意粉每啖都充滿茄香。

杯有機茶開頭比較淡，放多一陣甘香味先出左黎。

去唔到旅行，食完飯係西貢行下都好有外國風情feel。

蔡農日籽 Good Day

地址：西貢普通道11A號地舖

Tel : 9688 2820

前菜主菜都對版 : Kinship

 

放半日假既平日下午，又係時侯去搵未試過既餐廳。

平日中午既lunch time到埗已點半所以冇咩人。

一個價錢$198包前菜同主菜，加埋甜品就$238都合理。

前菜Beef Tartare上面既炸薯都好香口，牛肉tartare同乳酪汁食落幾夾，怕食生肉會帶少少血味既人應該會幾鍾意呢個sauce。

Roasted Cauliflower雖然唔係肉類，但燒香既椰菜花真心更特別更吸引。

主菜既Macau Tamarind Braised Okinawa Pork Belly其實好東坡肉feel。

燉煮後入口非常淋又好入味，連塊皮都燉得岩岩好食落唔太油膩又有口感。

另一主菜㨂左Mussel & White Wine Sopresini。

雖sopresini唔算特別但個醬汁十分濃厚，既有酒香又有mussel鮮甜又惹味，呢碟真係醬汁主打既主菜。

前菜同主菜都真係對版，食完飽住個肚都冇位食甜品，雖係酒吧但出品幾好，下次要搵多兩個外援幫手掃餐牌兼食甜品。

Kinship

地址：中環些利街2-4號LL Tower 3樓

Tel : 2520 0899

吸收陽光 : Relish

Relish上年已到訪過兩次，今年第一次再黎就寫一下。

再訪當然係覺得出品有料到值得再黎，今日早到可以坐下窗邊位。

全場最闊落既梳化位，成個人訓係度都得。

今日早到可以影下偌大既室內空間。

今日天氣好，要坐窗邊吸收陽光。

田園沙律食落爽口，沙律菜冇苦澀味。

蕃茄湯夠濃，放湯既蒜蓉面包吸收左湯汁更惹味，跟餐既夏威夷冰茶唔會太甜解渴一流。

紅咖哩軟殼蟹意粉既紅咖哩唔係唔夠味，但可以再濃d就更好，因為食得咖哩既都應該係重口味既人，另意粉既口感不錯，加上軟殼蟹既鮮味，其實係值得一食。

另一個主菜係赤味噌燒西班牙豬仔骨配野菜跟香草烤新薯，豬仔骨肉質緊緻兼肉味濃，只係赤味噌唔算好入味而已。

甜品來一客伯爵茶芝士蛋糕，芝士味十足，食落感覺似New York cheesecake而口感幾幼滑。

食又食飽陽光又吸收左，係時間出去條街度行下落下格。

Relish

地址：觀塘鴻圖道63-65號鴻運工業大廈5樓B號舖

Tel : 2638 2228

日子重臨 : 逸東軒

呢掛有舖點心癮，上個月尾睇到呢度四月頭重開兼有promo，二話不說就book左假期中午黎食番餐開心下。

上次黎都唔係近期既事，格局冇變，檯同檯之間有足夠空間，除左安全外傾計都可以保持私穩。

水滾茶靚，飲住茶等點心上檯。

點心未到前菜先上，爽口四季豆先用黎打底。

重開頭幾日送既叉燒每人兩塊，咬落都幾鬆化。

筍尖蝦餃大細剛好，熱辣辣又足料，一人兩隻冇難度。

海鮮芋角外皮香脆，內裡既芋蓉十分軟滑。

可能掛住食所以冇幫陳皮牛肉球影騙照，好彩重有張大圍相頂住。牛肉球食落感覺冇咩落粉，再食真d就有陳皮香氣滲出。

叫左未試過既香煎墨魚籽粢飯試下，香口野做得夠熱夠脆已贏一半，粢飯食落黏口有米香贏埋另一半。

今日除左平時食開個類，另外點多一個鮑魚京蔥和牛酥食下回味下。

重開前呢度既出品已俾唔少人推介，重開後冇走樣，睇怕好快又變成一檯難求既日子重臨。

逸東軒

地址：逸東軒佐敦彌敦道 380 號 Eaton HK B2 樓

Tel : 2710 1093

唔使諗下場 : 升哥點心

 

今日有事又去大西北，五點幾先叫做得閒坐低醫肚，人已在元朗都唔使諗去第二區搵食，因為呢區實在太多選擇，隨手睇下地圖搵下附近有咩食就睇到呢間點心。

一個人食力有限兼想食完走多一間半間食下其他野，所以一開始只點三個點心，交點心紙前一刻見到春卷都係推介，心諗春卷都唔會太大份就要埋，點知就埋下飽到上心口既伏線。

蝦餃先到，岩岩出爐熱氣攻心，隻隻蝦餃都份量唔細，餃皮唔算好薄但都唔係厚，入面好足料蝦肉味道對版而餡料都塞到好爆。

山竹牛肉送上三大球，睇落都足料，食落牛肉口感及味道都可以。

蟲草花棉花雞又係足料，蟲草花較少但雞件擺到滿，下面既棉花即魚肚都唔少又吸左雞汁，比雞件更吸引。

最後既西紅柿春卷先勁，一條開二即係六條，但其實個半條已經係出面既一條份量，即係等於叫左兩碟，重要入面塞滿菜同蝦槳，未食完都知道唔使諗下一場。

呢度既點心味道唔錯，而且真係足料，入開元朗可能會番兜試下燉湯。臨走聽到個似係熟客話糯米雞食落有d削，店家都認係，又話今朝都有客咁講所以會留意，店家從善如流既態度應該可以令到唔少客人變成熟客。

升哥點心

地址：元朗鳳琴街19號鴻運中心地下52-59號舖

Tel : 2833 6999

忙裡偷閒 : Cruising Coffee

 

  今日早少少收左工又人在大西北，忙裡偷閒搵左呢間幾新既咖啡店坐下飲杯啡。

店名大大隻字鑲左係天花板。

牆邊有排吊燈營造氣氛。

舖面唔係直接對街而係對內園，感覺比較對街既位置更寧靜。

室內空間雖不大但都舒服，只係滿坐時有d位置會背貼背。

簡單點杯flat white，奶同啡比例ok不過唔算好岩口味，有機會再過黎會試下其他出品。

Cruising Coffee

地址：元朗元朗安寧路38號世宙商場地下4號舖

Tel : 5599 6675