早幾個月一幻屯門店開幕時去左一轉，今次到荃灣店新開幕，上次一個人試唔到太多，今次叫多左人終於可以試多d野。
早幾個星期熱到暈 好似重破左咩月份最熱紀錄之類，上個星期好似好少少，因為叫做落左雨，加上間唔中有陰天先叫做好過少少，就趁冇咁熱黎到大公館入面既火鍋品牌《大公別館》食個手工火鍋助下興。
今晚既手工火鍋湯底係川蜀麻辣鍋併花膠濃湯雞鍋，麻辣鍋一開始已夠麻但唔算好辣，不過食食下辣味上左一個level愈食愈辣愈刺激，另外花膠濃湯加埋花雕雞件後湯頭更鮮甜真心好飲。
先上成條加拿大象拔蚌刺身，優惠價只收$588又真係幾抵，成條象拔蚌份量十足，刺身十分彈牙，沾上刺身豉油突出鮮味已經收貨。
食火鍋點都要食牛肉先似樣，本地新鮮牛肉牛頸脊肉味濃到爆；美國安格斯牛小排食落就嫩滑無渣。
手工火鍋配料擺成花型既牛胸油好靚，食落滿口油香雖邪惡但真係會令人食唔停手。
招牌四寶丸都十分足料，但自己都係偏愛墨魚丸既彈牙同鮮味。
台山蠔隻隻都有番咁上下大，煮完都冇乜點縮水，食落蠔味都幾濃；台灣嫩鴨血冇改錯名，入口嫩滑吸收左麻辣湯之後更惹味；自家製千層枝竹都係落湯幾秒就食得，吸左湯後豆味突出；而煮好既手打魚腐入口一咬即散，冇咩口感可言味道都偏淡。
鮑魚雞粒餃都幾飽滿，不過鮑魚味弱左d 變左雞肉味主導，其實都不失為一個唔錯既選擇。
最後飲杯紫貝天葵降下火順便解渴。夏天愈黎愈熱似乎已經係趨勢，不過點熱都好，自己同身邊好多朋友都對火鍋不離不棄唔打唔安樂。
大公館 Greater China Club
地址：荔枝角長義街9號D2 Place 1期10樓A號舖
今晚邊爐夜黎左香江花月，呢間餐廳以50年代既香港為主題，帶出以前華人洋行既感覺，由坐位裝修到氣氛，可以做既地方都似模似樣。
放眼一排排古董電話既牆身、雜貨店既滑輪、米舖既稱陀、重有舊式打字機同留聲機都係呃like位。
周圍除左唔少當年華人洋行既擺設，入口隔離更有個非常日本東京Team Lab feel既空間，你話就算黎到只係想食裝修同打咭都唔誇張。
用自家菠蘿味糖漿加薑水做既鳳琉香，上檯會加埋香味波波同煙霧效果，另外以洛神花玫瑰蘋果等做糖漿既瑰洛月，雖然冇咁誇但玫瑰型紅色冰花都好靚。
小食既黃金炸魚皮同炸豆腐真係送酒佳品，加上今晚朋友帶黎既烈酒更加食唔停口，攪到未正式開波打邊都有少少飽。
點左牛乳玫瑰鍋加香江拼，中間係用日本北海道全脂牛乳雪到成個玫瑰花型，唔講呢舊野好唔好味但真係搶爆鏡。
香江拼即牛肉併盤，部位有手切牛、安格斯牛肉、牛胸油、牛黃喉、牛𦟌同牛脷等，手切牛跟預期一樣牛味最濃，牛胸油食落香口係重口味既人之選，牛黃喉爽滑，鍾意呢味野既一食就知係好貨色，牛𦟌咬落煙韌完全係另一種享受，而牛脷對我黎講係必食，煎炒煮炸同火鍋都唔會放過。
三色餃係黑松露長腳蟹餃、芝士鮮菌餃及野生松茸餃，當中都係芝士鮮菌最惹味自己最buy。
自製三色墨魚丸係咸蛋黃、黑松露同蟹籽口味，墨魚味係幾濃但又唔算好食得出個三種口味。
追加既鵝腸同鴨血都表現唔錯，鵝腸夠肥夠油潤，鴨血食落夠滑，不過如果配麻辣湯底應該重岩feel。
冬甩墨魚菓子中間釀入開心果，食落口感比一般既特別又有唔少墨魚肉，不過感覺自製三色墨魚丸既墨魚味更濃。
呢度要懷舊有懷舊要華麗有華麗，野食又靚又有水準，而家熱成咁都爆場，如果冬天黎到應該重旺。
香江花月 Victorian Era
地址：佐敦道35號百誠大廈2樓
電話 : 2736 8368 / 65657888(whatsapp)
單邊大玻璃窗透入充足陽光，如果怕太曬都有另一邊裝潢悅目既位置可選。
先上既係韓式開胃特飲，特飲似乎加左覆盆子，入口微酸解渴唔錯。而香脆蔬菜片如其名，薄切後炸香食落真係好脆，只係簡簡單單用左鹽調味已經帶出蔬菜原味。
上檯既薯蓉蒸香菇有啲黏口入口鮮甜；純素蔬菜湯用蕃茄做主打，蔬菜湯十分夠熱，茄蓉香氣直撲喉嚨。
左邊既煎牛蒡唔會太油但亦唔係係走香脆路線，食落帶微甜口感有啲似食緊年糕既感覺；右邊金針菇入口煙韌中帶微辣及芝麻香，中間杏鮑用左十年陳既醬油伴上，令本來已經突出既鮮菇味更多一個層次。
用左天然色素既蓮藕餅十分搶眼，雖只有兩件但份量唔少亦咬口十足，但藕餅不是我所好，淺嚐一件後另一件交身邊人完結。茄子蕃茄同樣用上陳年醬油襯托，口中一時間香甜酸夾雜一起；中間甜辣酥炸菇菌既粉槳夠薄食落香脆，而酸甜交錯好有咕嚕肉既影子。
表面搽上辣椒醬既風乾蘋果入口果香中帶辛辣；右邊既牛蒡絲豆腐都加入陳年醬油添加風味，不過牛蒡絲在上面可能吸收過多醬油變得有啲鹹，相反下面已煎香既豆腐就吸收左岩岩好既醬油份量令豆味更突顯。而下面既青瓜麵食落清爽，加上菇絲及芝麻後整體味道更討好。
韓國寺廟主食送上，當中大醬湯味道十分濃郁，同係韓國食到既冇分別。而免發酵既韓式泡菜十分爽甜。
主食係香菇飯，而米飯香味中隱隱帶出菇香，加上中間幾款特色配菜，令人不自覺成碗食到見底。
韓國甜點係柿卷口感軟糯又充滿柿香，而芝麻酥做得夠香口但對自己黎講有啲偏甜。
韓國素食雖然唔係石破天驚既出品，但總廚具辰光以往在韓國寺廟跟隨當地主持學習寺廟素食製作多年，出品精緻有板有眼，對於喜歡素食又喜愛韓國菜既人黎講，不失為一個好選擇。
土生花 Soil to Soul
地址：尖沙咀梳士巴利道18號Victoria Dockside K11 Musea7樓704號舖
Tel : 2389 9588
