剛過既星期日比較得閒，天氣又開始凍，個人開始可以食多d野，中午過後就入屯門tasting試一幻拉麵既屯門新店。
裝修同門面都係走日本風，除左吧檯重有卡位，只係我懶冇影到。
入黎之前已有目標，先試冬日限定「札幌咖哩蝦湯拉麵」跟粗麵。
湯汁既咖哩味十分濃厚，有d搶左蝦湯既風頭(其實都唔係有d囉...)，不過好鍾意咖哩既人應該buy既，而角切叉燒口感都不俗，食落唔會太瘦又有咬口，另呢碗要左粗麵食落都彈牙兼掛湯。
另一碗係屯門店限定「北の極番茄蝦湯拉麵」跟幼麵。
湯底都係招牌甜蝦湯底主打，而拉麵已跟半隻溏心蛋及日本叉燒，溏心蛋及格而日本叉燒肉味濃，另湯中加入蝦油爆香既洋蔥及一片北海道下川町「北の極」既番茄片(睇個日本名好似好勁咁)，片蕃茄係爽口同甜既，心諗食多塊蕃茄都可以幫下手清下油膩感，不過湯汁就冇咩蕃茄味，但招牌甜蝦湯的確好飲，帶起左成碗麵既鮮味。而呢碗幼麵其實一d都唔幼，如果閣下以為係廣東麵咁幼就諗多左，相比之下個人亦鍾意幼麵既口感多過粗麵。
開幕日起一連五日即12月16至20日，一幻屯門店所有拉麵都有「得一賞二」優惠，堂食任何一款拉麵即可免費享用另一碗價錢較低的拉麵。另12月21日至1 月10日會推出$128限定拉麵套餐，包括一款拉麵、一客餃子及飲品及抗菌潔手噴霧。
一幻拉麵
地址： 屯門市廣場一期2樓2319號舖
Tel : 2312 2399
