迷你.黑洞

Happiness Real only when shared.

[澳洲.悉尼] 澳洲新婚之旅(Day 5)


本來第一日落機就打算去Sydney Fish Market,不過睇清楚先知個度三點就關門,應該趕唔切,所以改左第二日當做早餐。
Sydney Fish Market最主要都係去入面果個類似Food court既地方食海鮮,因為時間係朝早既關係,擔心一早就食生冷野個肚會唔舒服,所以就買左一碟grilled snapper配白飯,但件魚好鞋,都係建議淨係食生野好,除非好想試果d的咩焗龍蝦呀、帶子等等。




綜合悉尼在地友人的意見,一定要食既係scampi,一種個樣似蝦既海鮮,個度1公斤要69.99,而1公斤只有大約有6至7隻,一d都唔平,但係真係超好食,非常鮮甜,晌香港都唔容易食到佢。
另外覺得海膽都值得一試,雖然一定無日本果d咁甜,但質素都唔錯,不過朋友話買左返黎要快食,時間耐左就無咁好味。
生蠔買左四款,兩款係Tasmania種,而因為之後會去果度玩,所以只係買左兩款試下。十月未係生蠔最當造既時候,所以比較細隻,有d偏鹹但蠔味仍濃郁,爽脆新鮮但唔係甜甜果種,一打$15我覺得算係咁,而且細細隻可以食多幾款。
除左scampi海膽同生蠔,其實重有好多海鮮賣,而我地就幾乎所有既海鮮,都只係晌一間門口掛住一個"生猛海鮮"既牌子果度買,佢又唔算特別平,不過有齊我地想要既野,其實間間既價錢同海鮮選擇睇落都差唔多,唔會差太遠。
晌附近一個叫Star既賭場下面既商場有一間叫Zumbo既甜品店,聽講係澳洲某個廚藝節目中,一個好有名既廚師開既。當日中午去到睇下,門口個櫃只係得返幾款蛋糕,賣相唔算係好吸引,所以我地決定只買兩個Macaron試試。
佢地將各款macaron放係模仿既緊急消防掣入面,外面重寫住"In case of emergency break glass"都幾幽默。
最後小試牛刀買左紫色的Salt & Vinegar同埋寶藍色Malted Milkshake,以Macaron黎講都唔算太甜,可以接受,Salt & Vinegar幾得意佢既醋味都幾出,唔好甜但順路既可以去行下。
午餐訂左一間叫Little Snail既餐廳,晌Harbourside商場旁邊,午市套餐三道菜$36,晌餐廳網頁就可以訂到位。本來以為法國菜份量應該唔大,但結果飽到癲左。
個日天氣都好好,可能係平日關係,冇咩客人留檯,所以安排我地坐係落地大玻璃窗旁邊。
單單是頭盤的焗蝸牛已經有一打,仲要配埋麵包,鬆弛既鵝肝醬就好似罐頭咁大,點都好出得黎行預左要食。好在鵝肝醬都幾滑幾香,蝸牛又有d似螺既食味,其實食頭盤既呢一刻d海鮮都未落晒格。
主菜點左一個beef tenderlion(要額外加$3),牛肉肉質幾嫩,只係唔太夠肉味,而我就要左seafood plate,有魷魚圈、青口、煎三文魚、炸軟殼蟹和玻璃蝦球,味道唔錯,只係嫌佢唔太夠熱。
大家唔好唔記得呢個係3 courses menu,最後重有dessert,好彩唔係好大件,印象中佢地都唔太甜都可以食晒唔使打包走。
雖然食左咁多野,但味道唔錯,而且都真係幾底食,所以食到咁飽,都唔會覺得係浪費左的胃部空間。
食到咁飽,又係行街加隨心攝獵時間。食完行出黎就由Harbourside影到入番市區既Market City,邊影邊睇下野。
行完市中心影左相,落左d格就再食過,不過今次唔食鹹野食甜野。Messina係一間專賣gelato既舖頭,晌悉尼有幾間分店,gelato既口味都幾多,其中一間晌Victoria St.既有雪糕蛋糕,全部賣相都好精美,一件大約$11。
左睇右睇結果就買左Silvkova Pavlova同Royale W' Cheese,揀pavlova係因為响執左既藝穗會M at the Fringe食過難忘既pavlova,而揀Royale W' Cheese就因為賣相,可惜味道就不如賣相咁吸引,如果經過可以去望一下,因為都真係幾靚既。
夜晚坐朋友車去左Bondi beach一間叫Hurricane既餐廳,係出名專食ribs既,其實Harbourside果度都有一間,不過朋友話Bondi果間好味0的。晚飯時間去到,人多要等位,今日就算平日都幾多客人,最後差唔多等左四十分鐘先有位,所以有心黎既都係訂位好d,不過果度坐得唔太舒服,有少少迫,如果可以坐邊邊位會好少少。
頭盤叫左沙律同garlic prawn,garlic prawn好似十幾蚊,但只係得六隻,有少少唔抵,如果要食蝦寧願去Sydney Fish Market食多d好過。至於沙律可以叫一盤或者當係side dish咁叫,純粹覺得食得多肉要食少少菜,而沙律本身無咩特別,可有可無。
主菜我地三個人叫左一個Chicken & Ribs大家share,有半份ribs同半隻雞,大約$44,可以配薯條或者焗薯,因為近來比較熱氣所以就要左焗薯,焗薯好好味,而且仲有sour cream添。一開始見到外國人個個都叫半份ribs覺得好誇張,但其實只係個size大,肉真係唔算好多,如果正餐咁食,叫full rack兩個人食都無難度。另外仲可以叫半份豬半份牛,不過因為朋友唔食牛,所以叫左雞,我諗牛應該都幾好食。燒好既ribs都唔錯,好入味,d肉又唔會太乾,相反雞就麻麻,唔知係咪因為用同樣既火力去燒雞,肉燒到有d霉,所以都係淨食豬或者要牛穩陣。 
食完晚餐雖然都飽,但未係今日最後一站!因為有車坐又有人帶路,先同悉尼大橋影張夜影相,再去左悉尼北邊既一間24小時既Maisy's Cafe。
去到其實志在hea下,所以只係食左一個Warm Chocolate Mudcake,唔知咩價錢,因為唔係我地找數(多謝!)。間野個廚房係閣樓,所有食既野都要吊落黎,雖然得意但都幾麻煩。
個蛋糕幾好味,佢仲有另外其他西式甜品好似apple crumble,不過已經有d夜,都係時間抖下。可能開24小時關係,就算晚上十一點幾都依然好多人,不過果邊唔係咁方便,除非有車否則唔駛特登去。

~By 鬆弛~

Sydney Fish Market
Pyrmont Bridge Rd, Pyrmont NSW Sydney Aus

Zumbo
Shop 1, Cafe Court The Star, 80 Pyrmont Street, Pyrmont NSW Sydney Aus

The Little Snail
50 Murray St, Pyrmont NSW Sydney Aus

Messina
shop 1/241 Victoria St, Darlinghurst NSW Sydney Aus

Hurricanes Grill
130 Roscoe St Bondi Beach NSW Sydney Aus

Maisy's Cafe (24 hours)
164 Military Road, Neutral Bay NSW Sydney Aus

更多最新的飲食資訊在我的Facebook page,請給我一個’LIKE'吧!

0 意見:

張貼留言