迷你.黑洞

Happiness Real only when shared.

前日本領事家廚主理 : 三原 鐵板燒 Teppanyaki Mihara


一段時間冇食鐵板燒今晚就約左兩位都住得近既食友一齊去將軍澳呢間三原鐵板燒
黎之前睇左資料知道大廚三原先生以前係日本駐美國芝加哥領事館擔任總領事既首席家廚,在任幾年間除左為總領事煮野亦都會為來自世界各地黎既客人烹飪日本料理。

部份蔬菜類食材已整齊擺好等大廚出手

前菜既螢光魷魚簡簡單單但入口鮮甜日式蒸蛋食落夠熱蛋漿好滑

大廚在準備黑毛和牛肉西冷薄燒時見到西冷既油花幾靚燒好後加埋配菜一口一件入口油香十足雖然幾邪惡但點都食曬先算

輪到海鮮食材同配菜準備出招

煎好既北海道銀鱈魚朴葉味噌燒睇落都幾吸引因銀鱈魚肉裡面既魚油似乎好飽滿煎過後魚油都都流曬出黎包圍住成舊魚肉食落果然係油香滿口再沾d可以突出魚味既味噌轉頭大家已得番塊吉左既葉

香燒原隻大海虎蝦跟意粉真係冇用錯名隻蝦真係幾大,而意粉吸收左大蝦汁即刻升呢煎好既蝦肉亦入口夠彈

特選宮崎A4和牛西冷見到塊肉已令人流口水
燒好既和牛內裡仍肉質粉嫩而外面就香口大廚切成大約一舊一啖食既每一舊放入口一刻口中既油同肉味都令人好滿足再加入鹽或胡椒提味又係另一種享受

經典蒜蓉炒飯米粒分明而大廚既炒飯雖然冇乜其他配料不過炒好滲出既飯香已夠叫人自動成碗食曬

麵豉湯同醬菜都不過不失布甸同意大利芝士蛋糕都入口幼滑 

以往想食鐵板燒一般都諗去尖沙咀唔係就過海去銅鑼灣,而家使出尖咀唔使過香港,係將軍澳都食到似樣既出品

三原 Teppanyaki Mihara
地址: 將軍澳唐俊街18號The Parkside第一座地下G06號舖
Tel : 3618 8212

日式燒 x 懷石概念:焼肉而今 by 富小路やま岸

喜歡日本菜的朋友應該都聽過2021年獲得米芝蓮榮譽的懷石料理店富小路,近來在同一商場開了新副線的本格燒肉店「燒肉而今」,趁新開張還未有太多人,找了個平日來試試午餐。

這裏提供的肉類都由日本當地直送,是最高級的A5和牛,並且大部份都由來自擁有過百年歷史的「日山畜產」提供,質素有保證。

與一般日式燒肉店的裝潢不同,單邊落地大玻璃採光度高,加上淺木色的和式設計,感覺光猛開揚。

午市套餐選擇都不少,由燒肉到壽喜燒,以至拌飯和烏冬定食都有,價錢由$180起。不過這裡最有名是A5和牛又怎可能錯,就選了$480極上A5黑毛和牛燒肉盛合。

燒爐有一個特別之處就是利用蚊香型的發熱線,火力會比一般的更平均,更適合燒肉。

燒肉套餐會附上沙律、茶碗蒸、前菜、泡菜、白飯。沙律伴以帶酸香的柚子醋汁,開胃的同時亦可解茶膩;碗蒸裡面加了蟹肉,入口滑溜;前菜有紅蘿蔔煮牛肉粒,味道帶點甜甜的。




盛合包含了四款不同部位,包括上肋、背身、肩胛和牛柳薄片,脂肪分佈略有不同,另外還有紅薯和舞菇。

剛才也有提到因為爐的設計火力會較平均,牛肉燒出來的網紋特別漂亮。



四個部位各有特色,肉味最濃郁的當然是牛肋肉,不過個人就最喜歡肩胛肉,而牛肉夠薄每邊只需輕輕燒三秒即可。牛肉入口軟嫰,油脂分佈平均,入口帶豐富的油香脂但亦不過份油膩。再配一口白飯超級滿足。

甜甜的紅薯亦相當美味香甜,當作是甜品之一也不過份。

最後附上可可Mochi甜點作結尾。

後來再看不少網絡上的評論,大部分人都是來試晚市$1280十道菜和牛Tasting Menu,食物種類多之餘更有和牛海膽菜式,看來相當吸引,有機會也想訂檯試試。

焼肉而今 by 富小路やま岸

地址:尖沙咀梳士巴利道18號Victoria Dockside K11 Musea6樓603號舖

四人辣局 : 祥仔辣辣

終於等到由二人限聚變成四人如果得兩個人食西餐感覺好過食中菜因為兩個人食中菜未必叫到好多想食既野,既然而家可以一檯四人今晚就湊夠四人一齊去辣一辣佢試下川菜

前菜上左三樣青瓜麻辣粉皮做得唔太好,粉皮太厚影響口感之餘,個汁都怪怪地。好在貢菜伴紅海蜇花既海蜇夠大塊入口爽脆另招牌口水雞麻辣兼備,所以最後呢碟都清左碟

清炒松露蝦仁或宮保蝦仁二選一,我地覺得既然食辣野就叫宮保蝦仁比較應景,出黎既效果都有酸甜既味道,不過兩方便都可以再加強就好了。

呢期似乎重興緊食酸菜魚,所以店家都出左個招牌祥仔酸菜魚湯底用左豬骨雞骨之餘飲落重有最緊要既酸菜熬出黎既酸味同rosemary迷迭香既味道令湯底層次更豐富加埋切得唔算好薄但食落滑身既鱸魚片呢個招牌祥仔酸菜魚都冇辜負到招牌呢兩個字

都食左兩味海鮮都想試下肉類出品孜然一字骨既肉味夠肉質實在亦食唔到鬆肉粉既味但係孜然香味聞係聞到而食落就弱如果落番重手d會更好

食完魚同肉要有菜平衡一下干鍋福建棷菜出黎個樣就麻麻地,但其實炒得算乾身香口食落都爽口惹味。

飽肚野送上招牌櫻花蝦炒飯飯粒算乾身又粒粒分明食落有炒飯香氣不過櫻花蝦作用唔算好明顯見係見到但食落唔太有存在感但係鍾意食炒飯既人都應該會因炒飯香氣而收貨。而個酒釀桂花湯圓既湯圓重可以一食酒釀甜湯對我黎講太甜亦都太杰。

四個人食住飯吹下水,順便睇下望下個海景咁就過左一晚

祥仔辣辣
地址: 尖沙咀廣東道3-27號海港城海運大廈LCX3樓32號舖
Tel : 2818 8988

空手入寶山 : Bâtard


農曆新年前既半日平日假期 見係平日就試下book呢間近期幾hit既餐廳Bâtard,好彩book到一點半個轉,不過我地唔係酒徒,見到入口既貯酒量都幾多,聽講價錢都親民,加埋係度買埋入去free corkage,我地都冇買酒入去食飯,俾酒鬼聽到一定覺得我地攪錯呀,咁都唔買枝酒入去嘆下,感覺係入寶山空手回,不過日光日白又只係食晏,食完又有地方想去,算啦都係集中精神欣賞下人地既美食就好。
行入餐廳前先見識到店家既貯酒真係唔少野。

穿過一道門正式行入用餐區,偌大既空間佈局舒服,感覺又唔係太拘謹。

另有檯位俾人飲酒吹水。

今日黎到都係劍指Bâtard Set Lunch,而且睇落好多野都岩食實在太好了

跟包上既牛油好勁牛油味,不過同自己講左要忍手唔好食包食飽左咁傻。跟住既頭盤House-made Duck Rillette on Toast 52-Month Iberian Ham睇落有d乾,睇落係唔知好唔好,但食落油香十足肉,肉味亦都跟著油香隨後湧出黎,真係唔食唔知幾好食,食左先知係好野。

Cold Angel Hair, Grilled Obsiblue Prawn, Kombu (supplement 8g of Kristal Caviar +HK$280),上檯時店家介紹隻蝦係刺身級食用蝦,所以唔使全熟煮到岩岩轉色就得,食落充滿BBQ香味又因為唔係全熟食落真係好嫩,而凍食既angel hair口感好亦都吸收左足夠既昆布同香草味。

主菜既Scallop Rouelle, Maine Lobster, Crustacean Sauce外型好靚,切開中間係軟滑兼彈牙既龍蝦帶子肉,落刀已感到呢球白色野軟滑有彈力,食落口感同想像既一樣,味道以帶子鮮味為主,而龍蝦肉係切成粒收狀混入去,因為唔係每一啖都食到一樣咁多既龍蝦肉粒,所以龍蝦味係口中時濃時淡。 

Grilled Wagyu Bavette M9+ from Mayura Station, Fries, Bearnaise上場,切開中間睇睇先...果然係medium rare火喉喎,睇完梗係即刻切舊食下,Wagyu入口唔算太油,反而肉香幾濃而食落肉質都好軟熟,如果鍾意食重肉味既人,應該連芥末醬都可以慳番。

Grilled Maine Lobster, Pasta雖唔多見汁,但睇見條pasta煮到轉曬色都估到咩事,因為好多汁已俾pasta吸曬,所以食落十分濃味亦都好有嚼勁。雖然舊龍蝦肉都好食又鮮味,但真心覺得pasta先係呢碟野既主角囉。

Fresh Baked Madeleines上檯已聞到香味,焗得香口邊位微燶,食落脆邊味道唔係太甜,岩曬我地呢d偽甜魔。

今次日光日白黎試左午餐感覺幾好,有機會都想番兜試下晚餐,不過booking應該幾full,有心食既應該都要等番兩三個月。
地址: 西營盤干諾道西165-166號偉景閣地下
Tel : 2318 1802