迷你.黑洞

Happiness Real only when shared.

疫情中邊爐心癮 :盛記麵家

 

疫情係11月尾又出現高峰,當大家以為聖誕可以開下party既時候,第四波既殺到令大家既聖誕同農曆新年plan即刻煙消雲散,特別係party room一收皮真係唔知去邊開party,攪到咩氣氛都冇曬,終於等到上星期開番晚市,都係想打個邊爐先講。

野食未叫湯底行先,叫左個胡椒豬骨併印尼喇沙湯底豬骨湯已煲到出味但喇沙湯既濃淡有少少飄忽以前最初食夠濃跟住有一期淡左今晚又有d淡所以加番少少沙茶醬就差唔多

炸響鈴係呢度名物 次次食都係即炸入口真心脆又夠豆味不過食得多幾舊真係會飽左食唔落其他野但可能太耐冇食今晚前後食左四大舊都冇頂住個胃

呢度係老字號應該同牛肉供應商關係好所以食親手切牛都有番咁上下質素入口無渣又有牛味已經係定律

一碟肉驚唔夠喉就叫多碟羊肉黎湊下熱鬧羊肉油花唔多所以都唔太強羊羶味對唔特別鍾意食羊既人黎講可能幾好我地呢d就覺得羶味濃d重好

店家既自製蠔仔餃係食友既選擇,我就加埋韮菜餃黎個餃子雙併蠔仔餃一食到中間既蠔肉蠔味就爆出黎都幾搶

盛記一向係自己既邊爐鐵膽,價錢公道食物質素有保證,如無意外今個冬天會黎多幾次,滿足番早幾個月冇左晚市但又想打邊爐既心癮。

盛記盆菜&盛記麵家
地址: 沙田瀝源熟食中心5號舖
Tel : 2962 6611

海鮮泰菜賀新春 : Mango Tree


一排冇食泰國菜,早幾日收到圓方Mango Tree邀約,去試新春期間的節慶海鮮饗宴 ,原價每位$698而家會員專享買一送一優惠,聽落好似都ok又想食泰國野就去一去。
好天氣下坐在窗邊曬下太陽食下野都幾寫意。
今日最高氣溫上到成25度,熱到夏天咁整杯解渴既青檸泰式沙冰最好不過,店家其實飲品另有promo做緊winter special既第二杯只收10蚊。
前菜上來「鴻運當頭」辣椒膏原隻帶子金不換既味道先攻入口之後係辣椒味既刺激帶子肉厚所以食落口感都可以作為前菜用來打開胃口係唔錯既。
湯品係「大富大貴」 原隻椰皇燉燕窩湯頭睇落幾清心諗會唔會唔夠味,但飲落又夠喎亦真係食到燕窩碎,不過椰子味唔夠出,如果可以加番多的椰青水去燉可能更好

主菜先上「笑口常開」炭燒珍寶河蝦河蝦上檯時燒烤味湧出黎咁滯燒完既蝦身有焦香但蝦肉又唔會太乾另蝦頭既膏夠多要挑剔既話就係蝦膏既味如果濃d就更好。

「年年有餘」係青檸辣椒明爐蒸銀鰽魚泰國菜本來都有類似既野不過由常見既烏頭改用銀鰽烏頭版本食得多通常一路煮一路條烏頭會愈食愈嚡但呢條銀鰽本身上檯只係岩岩熟而魚肉入口好滑兼一路食又唔會點變嚡個下先feel good湯汁都好醒胃,不過點都要再辣番d,話曬個菜名都有「辣椒」兩個字喎老細。

最後既主菜係「鴻圖大展」砂煲粉絲焗花蟹花蟹睇落好似唔算好大隻但其實食落真係好多肉肉質係食得出既新鮮亦都好鮮甜另粉絲煮得好入味份量又多食完呢個即刻飽到九成。

最後既甜品拼盤「金玉滿堂 」由香芒糯米飯、泰式斑蘭千層糕及椰汁西米糕組成西米糕正常,而斑蘭千層糕講真唔係我杯茶,但香芒糯米飯既入口軟糯就令人有衝動想用千層糕換一舊糯米飯番黎囉,最多俾夠兩舊千層糕又點話

新春節慶海鮮饗宴由2月6直至26日只在圓方Mango Tree供應,原價不算吸引,但會員可買一送一既話就可以諗下

地址: 佐敦柯士甸道西1號ELEMENTS圓方金區2樓2032號舖
Tel : 2668 4884