今次旅程目標雖然係鎮海櫻花節，但因訂票問題只可由香港飛到仁川，再由仁川安排交通到鎮海，回程又要上番仁川上機，其實飛去釜山再去鎮海會近好多。
上網查過仁川或首爾KTX去釜山既座位已爆滿或時間好差，最後決定租車去鎮海。好處係時間自由，時間地點可自己安排，壞處十分明顯，開車南下北上加上順路去其他城市，三日要揸最少1000公里或以上，每日有3至4個鐘揸住架車，唔習慣會非常辛苦。
下午機去仁川，順利晚上9點幾到埗，不過長假好多遊客，排左成個鐘先過到境。
因為夜機到達，第一晚唔入首爾而留係仁川市，但機場快線AREX去仁川市內唔順路，決定坐機場巴士去仁川市區再轉地鐵去酒店。
等左幾分鐘就有車，坐左半個鐘多少少就到仁川市。
再轉地鐵坐20分鐘就到酒店附近出站。
今晚呢間Hotel Centric Incheon都近地鐵站，又近取車地點。
大堂新淨有staff長註。
房夠大又光猛。
廁所乾濕分離又乾淨，住一晚完全收貨。
未食晚飯check-in完落樓醫肚，住呢度另一賣點係附近有唔少餐廳之餘，重要開得夠夜兼有24小時既餐廳同便利店。
今晚得9度都係想飲下熱湯，就去左酒店前面間동남집試下牛骨湯同餃子。
店內客人唔多。
已經差唔多11點餓到一個點，快快手點左牛排骨湯、餃子同醬醃生蠔。
呢度既泡菜好食又爽又甜，兩三分鐘就KO左一碟。
醬醃生蠔先到，係估唔到既又鮮又濃蠔味。
餃子好大隻，一人兩隻已夠食。
巨型牛排骨湯上檯，三大條連肉牛排骨跟煲上。
骨同肉一拆就分開，湯煮過後牛肉味略淡，點些鹽先入口可帶出肉味。
加左紅棗既湯汁微甜帶不錯牛肉香，似乎大骨肉既味都落曬個湯度。
食飽可以好好訓一覺，聽朝一早開車南下賞櫻。
15 Yesul-ro 204beon-gil, Namdong-gu, Incheon
+82 32-724-2000
Namdong-gu, Guwol-dong, 1132-7 1층, Incheon
+82 32-433-4414
0 意見:
張貼留言