大隱隱於巷 : Roji

 

時近年尾蘭桂芳又再開始熱鬧，在人堆中行入蘭桂芳的一條暗巷內搵到目的地。

今晚都係唔飲酒 ，叫兩個non alcohol cocktail，飲落都幾refreshing既Yuzu同Strawberry Drink黎解下渴。

頭盤先上Scallop，帶子唔算好特別，但加上萵筍絲除左多左口感，底部個柚子汁就幫左大忙，突出左帶子既鮮味。

Hamachi Ponzu切得厚而食落都幾肥美，醬汁就做成啫喱粒放係魚肉上，睇落唔日式但食落就好日式feel。

Chicken Skin既炸雞皮做得夠薄夠香口，配埋佢個惹味醬汁，一開始食就會不知不覺唔會停手。

Hokkaido Giant Clams除左殼大之外，蜆肉都真係好大，食落juciy有海水味，食完有衝動想叫多一碟。

King Crab Legs上面加左一堆綠色既惹味toppings，成條蟹腳肉抽起放入口滿足感爆燈。

估唔到呢度既Udon口感唔錯，入口煙韌，加埋紫蘇葉同明太子既加持又係冇得輸既組合。

食到呢一刻已開始飽，但個Sando Beef and Pork Sandwich放底一刻係吸引 豬同牛既混合肉係有肉香有肉汁，當拎起咬左第一啖，就會自然食到尾先停。

Dessert 既Skillet Pancake以白朱古力做膽加上焙茶雪糕，食落唔算太甜加埋焙茶味幾濃既雪糕，本來諗住食唔曬既甜品都係完全KO。

Roji大隱隱於巷，店內氣氛唔錯食物都對板，唔想係出面同人迫可以入巷發掘一下。

Roji

地址：中環德己立街20A號地舖

Tel : 98840704 (WhatsApp)

落鑊前say個hi : Pheromone

 

食友定時定候係Pheromone攪局，今晚有時間又夠夜就join埋食一晚。早左少少就去書店睇下書睇下貓，冬天佢地訓埋一堆好得意。

搬舖前食過唔算好多次，搬舖後第一次黎，地方又大左。

餐前小食先上雞皮餃子，炸得香口唔油膩，雞皮當餃皮用更吸引，我想話其實我可以食一打。

肉碎米通睇落碎料食落有料到，脆口之後麻同辣攻入口。

本來普普通通既沙律，其實蔬菜爽脆已經可以，加左櫻花蝦味道層次又升左呢。

餐湯今日出既係正常口味，南瓜湯加薑蓉係睇得出既配搭，南瓜蓉打得夠幼滑，雖然唔係以前個d睇唔出既口味，但都係有水準。

蒜蓉包個樣吸引但食到有少少苦，炒蘑菇夠香氣。

燈燈燈櫈有請各位今晚既參賽佳麗出場 ，係落鑊前出黎同大家見下面say個hi。

薯條都係呢度名物，我地本來諗住同隔離檯鬥快食完一盤，結果輸左幾個身位，因為我對面條友今晚揸流攤。

各位觀眾請以熱烈掌聲(啪 啪 啪 啪 啪 啪 啪 啪~) 歡迎我地今晚既1234號佳麗出場。

色澤粉嫩肉香四射，唔好睇呢舊好似冇乜油，食落經過一輪肉味之後油香就湧出黎。

飽肚野上左法式臘鴨飯真係估佢唔到，店家唔出聲會以為糯米飯，米粒比中式既糯米飯軟身但鴨油香重。

甜品普通，因為係冬天既關係，最尾都係選擇飲多碗湯先完埸。

今晚既經驗都很不錯，搬舖後冇乜跌watt，可以擇日再賽。

Pheromone - Steak House

地址：大坑蓮花宮西街1-9號地舖

Tel : 64379739

Dry Aged魅力 ： Bifteck

放假既日子多左時間，今日可以過海搵食，係行山前去QRE既扒房試試Dry Aged既魅力。

新位處23樓既好處就係可以望到背後既翠綠山景。

麵包跟上味噌口味既牛油，食落味噌香味十足。

頭盤既Daily Fresh Sushimi Ceviche食落很日式刺身feel，如果再加多d酸汁就更有南美ceviche既感覺。

另一個頭盤Steamed Blue Mussels送上，澳洲青口夠大隻亦肉質鮮美。

主菜之一叫左medium rare既Belgium Dry Aged 35 days Sirloin，出黎色澤吸引，肉汁都不少而食落軟熟，不過可能因為食得太慢，隻碟既熱力將最底既西冷煮熟左變成medium，食落口感差少少。

另一個同樣叫左medium rare既US Dry Aged 25 Hanger Steak，就咁睇未知如何，落刀一切裡面同樣火喉對板，食落肉味更濃郁，相信係Dry Aged左25日既功勞。

最後既甜品由Roasted Soy Flour Cake及軟滑Tofu Ice Cream作結。

Bifteck

地址：灣仔皇后大道東202號QRE Plaza 23樓

Tel : 2246 8805

初味之鮮 : 甬府 YongFu

今日放工趕來灣仔，不為甚麼只為一嚐正宗寧波菜，而此店開業不久已成為《香港澳門米芝蓮》推介。

頭盤先上招牌十八斬，大廚將蟹身斬成十八件上碟，用上東海梭子蟹配合秘製汁醬而成，不講不知原來蟹身已用零下１９７度保存左一年之久實在令人驚嘆，吃著肉鮮既梭子蟹加上色澤鮮艷既蟹膏，膏香同肉鮮比起來其實難分高下。

手撕鰻筒用上約兩斤重既東海鰻魚，先用鹽漬再風乾魚肉，令肉味更濃郁，食落魚肉細膩也帶微微鹹香。鰻筒肉質較實在，點上醋汁吃著鰻魚鮮味給引領出來。而寧波㸆菜上檯時黑漆漆一片，原來用了黑醋的關係，口味遊走於甜酸及油香中。

泡制菜梗看似最平凡，但店家只用選菜梗已知不是一般頭盤，除了梗部爽脆，估不到其香辣味道十分特別，是最令人印象深刻的頭盤。

蔣公芋艿羹用上獨立盅頭位上，未打開盅蓋真係唔知幾邪惡，點知豬油香撲鼻而來，食落油香果然比聞到更濃，好豬油香菜式既人轉頭已見盅底。

脆皮水潺用上九肚魚，先上加入東海海苔粉既炸漿再脆炸，嫩滑魚肉加上輕薄炸槳食落不油膩。

烹煮工夫有夠多既雪菜筍絲燒鱗鯧，魚湯呈奶白，飲落鮮甜充斥喉嚨，不過湯汁凍得快，大家都趁湯在冷卻前將鮮甜湯汁趕住送入腸胃。

前後要兩日時間去預備既紅燜拆骨豬手，豬手要先燜足四個鐘，燜到入曬味就拆骨，出黎既豬皮口感膠質豐富也非常爽彈，燜汁亦夠惹味。

海味麻辣豆腐食得到麻辣，加入海參粒令豆腐以外多一種口感，個人覺得再重手可能重好食，不過呢個出品已令大家都要叫碗飯黎伴食。

捨得就如其名，只用菜心最中間最嫩既部位，色澤翠綠入口軟嫩。

甜品由生果及寧波湯丸作結，湯丸皮薄而芝麻香氣突出，跟坊間已冰凍可一盒盒買走既真係天與地既分別。

４位用既甬府初味餐單套餐包括４個前菜及６個主菜加上甜品盛惠$4888，每位另加$618可配上由侍酒師跟據美食而配搭既紅白美酒3杯。

甬府 YongFu

地址：灣仔駱克道20-24號金星大廈地下2號舖及1樓

Tel : 2881 7899

世界最佳餐廳系列 The World's Best Restaurants Series : Central Restaurante

當年在秘魯利馬的最後一日，基本上沒安排什麼行程，只訂了晚餐去體驗一下Latin Americas's 50 Best Restaurants第3名的Central的出品。

回到酒店差不多晚上七點，梳洗休息過後就再度出發到Central晚餐。這家餐廳其實除了2019年在Latin America's 50 Best Restaurants拉丁美洲拿下第三名，在World 50 Best restaurants也拿了第6名，其實這餐廳在Worldwide 50的排名比拉丁美洲第一及二名的更高，此店於2023年終於拿下The World's Best Restaurant 2023的第一名。

自己是在早一年11月30日上網預訂，那天剛開放來年六個月的預訂，網頁也等了好一會兒訂到，如果有心來的話要早點訂位。

訂位時已經預先選好菜單，這裡分別有11道、16道菜和素食選擇。我們選了每位348sol的11道菜Mater Ecosystems。這餐牌除了介紹菜式和用料，最特別是標示了食材於那個海拔高度所取，當中有4道菜式的材料是高於3000米以上取材，而最高的Extreme Stems竟去到4100米，菜名改得好因這高度真令人有點汗顏。