迷你.黑洞

Happiness Real only when shared.

同區新舖 : 楚撚記大排檔


土瓜灣楚撚記大排檔都食左幾年,疫情前已經見到會細舖搬大舖,等下等下呢個月中終於等到開門,就搵晚平日夜晚試下新舖水準。
餐牌同以前好似差唔多。
呢個月重多左個每日特價新菜式既餐牌。

老火菜乾煲豬肺好足料,湯頭飲落好夠味夠火喉。
香煎黑松露手打墨魚餅煎得香口,墨魚肉入口係幾彈牙。
菠蘿拔絲咕嚕肉都可以,外漿都唔太厚包得算均匀。
麻辣韭菜鴨血煲既鴨血幾嫩滑食落又夠辣。
豆漿杞子鮮腐竹浸時蔬叫左紹菜,腐竹同紹菜普普通,反而係加入豆漿做既湯汁幾清甜。
避風塘鮮魷用左大量炸蒜十分惹味,下次要叫碗粥因為炸蒜同粥其實都好夾。
西楚霸王雞係今晚既半價菜式所以叫半隻食下,雞肉都嫩既但雞味係弱左d,好在底下既醬汁幫一幫帶番少少鮮味。
拔絲焦糖香燒脆腩仔應該係創新既菜式,可惜腩仔唔夠靚又唔太脆皮。
風尾蝦多士最後先到,雖然重係熱既但唔夠脆口,可能因新開加上太多客人令水準未到位,希望下次黎到可以做得好。
個別菜式都做得有水準,如果想食鑊氣小炒既可以考慮試下。

地址:馬坑涌道 2C 號寶光大廈地下C及D舖
Tel : 2515 1500

0 意見:

張貼留言