迷你.黑洞

Happiness Real only when shared.

出品見心思 : 唐述


食友既飲茶group都有好耐冇攪局,既然放寬左社交人數到8人,就搵個大家都得閒既星期六來個茶聚。

餐廳位處商埸3樓,前身既法國菜印象中都可以,只是疫情下就算好餐廳都未必留得住。

經過幽暗而富格調既長廊後才到餐廳。

走過走廊盡頭便見到酒吧、用餐大堂及維港海景。
餐具似乎都係精選過既配搭。

手工雲吞跟上紅油有點似紅油抄手,但呢個係飽滿版既辣度只是點到即止卻可刺激胃口。

頭盤送上精緻既五福臨門。

點心既玫瑰燒鵝酥係手工菜,外皮摺層做得工整外,切開可見用料十足及摺皮做得夠薄,咬落口感自然更香脆。
瑪瑙蝦餃同海參餃都飽滿,食落都係用料同鮮味十足。

櫻花蝦汁炆澳州龍蝦既龍蝦肉已經夠鮮甜,加上櫻花蝦汁既加持其實都幾犯規。
桂花烏龍煙薰脆皮雞又係一絕,上檯一刻煙薰香氣撲面而來,雞皮脆薄而雞肉亦嫩滑。

即場加入陳皮後,每一口紅豆沙都隱隱滲出陳皮香氣。

月光寶盒十分精緻,加上入面既話梅慕絲亦軟滑香甜,呢個寶盒真係唔食甜品既都要點一個黎打咭。

最後既百利甜酒蛋撻除左香酥外,也帶不弱既百利酒香甜。
除左野食外,餐廳由佈局到餐桌用品都見心思

唐述
地址:港景街1號國際金融中心3樓3101-3107號舖
Tel : 6809 2299

回不到現實 : Tuned Coffee & Roastery

 

睇完改編自村上春樹既奧斯卡最佳國際電影Drive My Car,先意識到冇食早餐趕入埸,完場後肚仔空空既感覺。三個小時雖看似漫長,但睇一個吸引既故事感覺只是一瞬間。
完場回過神來已一點半,就留在油尖旺附近食午餐。未到門口已見人龍,幸好剛過午餐高峰時間,未幾人龍已消散順利入座。

食品點了香蔥蒜蓉忌廉芝士包及油浸茄蕃茄醬肉丸扁意粉。
芝士包先到,企係度既蔥條及灑上包面既蔥粒固然吸睛,芝士包既軟熟熱燙加上cream cheese既美味,呢個芝士包出品有外表有內函,真係人見人愛車見車載。
飲品點了Fruiticano既菠蘿咖啡沙冰,咖啡既苦澀同菠蘿既香甜有不錯既化學作用,苦中帶甜十分討好。
至於蕃茄醬肉丸意粉其實還好,肉丸有瑞典傢私牌子既影子,只係相片不翼而飛唯有下次再影。
睇完Drive My Car意識被drive away回不到現實,是美食將自己從故事叫回來。


Tuned Coffee & Roastery
地址:太子洗衣街163-163A號鴻德大廈地下B號舖
Tel : 2381 3688

鮮甜香滑集一身 : Bar Bleu


今年生日係平日番工日子,不過既然冇得去旅行,d假都用唔著咪生日放自己半日假,半日時間出去呢間Bar Bleu食下行下當慶祝。

上半日番工所以中午已經可以食好西,約左另一半係中環食個午餐,餐廳雖然叫bar但唔係只有snack,有個正正經經既餐牌重有唔少選擇。

坐低唔使諗等食,另一半已打諗好兼預訂左,食住麵包等好戲。

Starter既signature Oyster唔係走creamy路線而蠔肉爽脆。

Shrimp Croquette即炸蝦可樂餅,外層酥脆入面軟滑。

食落蝦肉不見影但蝦味幾濃,因為蝦肉已同幼滑薯蓉打成一片。

不在lunch menu上既店家名物Japanese Snow Crab with Souffle Omelette and Herring Caviar日本鱈場蟹梳芙厘奄列配鯡魚籽先上檯,因一早同店家聯絡井安排好所以有得中午一嚐。

奄列脹卜卜蛋面帶微燶,一上檯就散發著蛋香,蛋身食落非常滑溜又有不少蛋汁,配上鮮甜鱈場蟹肉已經冇得輸,加埋魚籽既鹹香將蟹肉既鮮甜襯托出來,如果要一人獨吞一份都冇問題。

另一名物Carabineros XL risotto即XL size既西班牙紅蝦配意大利飯。
西班牙紅蝦一如想象中既蝦味係非一般濃郁,而意大利飯口感剛好亦吸收左紅蝦及其他口味既海鮮鮮味,所以雖然好飽但都將所有飯粒食清光一粒不剩。

食完兩碟份量十足既主菜,今次甜品又可以慳番。Bar Bleu既兩個主菜都出色,特別係鱈場蟹梳芙厘奄列可以話係鮮甜香滑一身,令人有衝動寫完文就想再食一次。

地址:中環士丹頓街9號地舖
Tel : 5980 6107rr

疫情回落食個tea : Hygge


某日行完山,見疫情回落下午又有時間,就見下因為有小朋友而成個月唔敢見人既朋友,去左佢家住既將軍澳區食個tea。

餐牌分為飲品同食品。

自家既蕃茄醬似乎係賣點。

飲品試左杯紫穌檸檬lemonade,想叫小冰不過冇得你揀,因為呢度係一大粒iceball,一開始lemonade幾清爽,但飲到尾就因為粒iceball太多水淡左好多。

鹹點叫左雙重芝士帕馬火腿可麗餅芝士同帕馬火腿都正常,可麗餅口感幾好夠薄又煙韌。

另一個鹹點叫左焫
焫著芝士辣肉腸薄餅,餐牌個名真係咁長小第唯有照打。食落芝士都係半溶狀態算係幾吸引既。

甜品就因為時間關係,只係有得影冇得食,雖然冇份食但睇相都似樣既

朋友揀既呢間店係區內好似都幾旺,要早兩日book檯,有興趣既最好book左檯先去。

Hygge
地址:將軍澳唐俊街28號海天晉滙地下G33號舖
Tel : 5172 9104

誤打誤撞 : German Road restaurant 德國佬餐廳


夏天未到之前,搵食小隊有人提議行個山,最後由小欖殺入千島湖再出大棠完事,夜晚梗係留係元朗食個靚飯先閃。本來想試個間日式串燒原來係人氣店要一早book當然食唔到,即刻再上網搵之下,誤打誤撞下就搵到呢間德國佬餐廳。
六點左右到,雖然未有人其實都有其他人book左檯,好彩重有walk-in位俾我地,唔使再搵另一間左撲右撲。

香港既德國菜都主要係腸同豬手,我地都唔會挑戰人地,所以叫番呢兩味既德國燒豬手同豬肉蛇形卷腸,再加個香辣鮮蝦凱撒沙律同燒西班牙黑毛豬鞍。
主菜要等麵包先上,食落夠熱又軟熟。

香辣鮮蝦凱撒沙律做足本份,沙律菜爽脆入口冇苦澀,大蝦唔算好大隻但食落都新鮮。

重口味重份量既德國燒豬手上埸,豬皮唔算太厚咬得開,食落香脆重有溶左既油脂黏口感覺,豬肉方面燒完都唔會好乾,口感會硬一d係無可避免,但肉之間有油份令口感又軟滑左。

豬肉蛇形卷腸同預期差唔多,啖啖肉之餘都有唔少肉汁。

燒西班牙黑毛豬鞍係估唔到既好食,就咁睇冇咩特別,但食落肉味濃油份十足,兼且外層燒過後夠香口又有脆皮口感,整體黎講真係唔會輸俾隻豬手。

呢間既出品做足本份又有d驚喜,下次入左黎唔知食乜好既話,轉頭可能會番兜。

German Road restaurant 德國佬餐廳
地址:元朗鳳攸北街11-15號益發大廈地下16-17號舖
Tel : 2479 2778