迷你.黑洞

Happiness Real only when shared.

食下餃飲下湯 : 維港灣餃子坊

 

呢排行山都去多左新界大西北,變相多左機會入去搵野食,元朗咁多野食自然會走入去睇下,時間唔早出番去轉頭就食晚飯,就搵左食友提過兼冇咁heavy既餃子試下。
餃子都係即包即煮。
出品唔算好多花款,都係幾款餃子再煎或湯煮,另外都有小食之類,最吸引自己係有老火湯同燉湯,想飲既個款燉湯賣曬,今日就試下老火湯。

叫左韮菜鮮肉湯餃同煎辣菜脯鮮蝦煎餃,老火湯先上,睇落夠火喉飲落都順喉。

韮菜鮮肉湯餃大隻得黎都幾飽滿。
裡面既肉同菜比例都唔錯。

煎辣菜脯鮮蝦煎餃既一面煎得香脆。
咬落落先食到辣菜脯既香辣,蝦肉味緊隨散發。

呢度既菜脯同辣椒油都唔好錯過。
下次入元朗掃街,唔想食太飽又想食多幾樣野既話,有機會再幫襯食下餃飲下湯

維港灣餃子坊
地址:元朗水車館街74號地舖
Tel : 2568 0166

衝出大埔 : 老虎岩餐室

 
食左大埔老虎岩幾年,一路都有幫襯佢地既連骨魚皮、牛類粉麵同燒賣,而家終於衝出大埔係油麻地開分店。
餐牌同大埔唔同但食既野其實差唔多,呢度就多左套餐。
呢度行QR CODE落單。
坐低都5點幾食下小食同三文治就好,燒賣味道同大埔冇分別,不過覺得炸好似好食過蒸,同埋口感淋左少少。
牛腩芝士治不錯,舖頭本身有好牛腩加埋熱溶左既芝士,都係冇得輸既formula。

以後想食佢既出品唔使入大埔


老虎岩餐室
地址:油麻地砵蘭街37號地舖

Tel : 5963 3772

賣點係沙律 : Uma Nota

 

今日放半日假 下午去試新野,搵到間日式巴西菜係中上環,價錢唔太貴睇相唔似伏就試下。
內部裝飾都有南美feel。
食邊個餐都係跟呢三個沙律頭盤,而且係任食
紫椰菜沙律比較普通,話用左mango dressing但唔係好食得出。
燒茄子沙律食落好夠軟淋,應該係冇牙都食到,加埋日本麵豉醬吊味真係夠濃味。
椰菜花沙律既主角幾爽口,夾埋個芝麻汁一齊食係幾開胃。
主菜既燒汁雞腿下面墊左一舊飯 食落冇口感似糊仔因為實在太淋,另雞腿就OK有燒烤香味都唔太乾。
Uma Nota Cheeseburger都幾大個,塊肉只係煮到medium rare所以食落幾juciy。
旁邊既蕃薯條雖然凍左,但跟上既鰹魚乾蛋黃醬夠夠惹味。
最後都冇再追加沙律,下次想食沙律可能會番兜再黎

地址:中環蘇豪卑利街38號地下C號舖
Tel : 2889 7576