迷你.黑洞

Happiness Real only when shared.

難以理解 : 老趙越南餐廳

 

去左小食店食左兩三樣野,大食食友當然唔夠喉,繼續留係渡船角食多一餐越南菜。
點解揀呢度?老趙係香港算越南菜老店,好多年前覺得愈食愈差想放棄,兩三年前食左一次覺得又好左少少,所以今日先會食呢餐。
食得老店都係想食番個幾味,生牛肉河一定走唔甩。點左咖牛腩加蒜蓉包,再另加小食牛油雞翼。
生牛肉河都係個幾樣要求,湯夠濃河粉夠滑同牛肉夠嫩,做得齊已經好高分,呢碗野一上檯牛肉唔夠嫩,湯唔夠濃冇乜牛骨味再加上河粉唔滑,註定係一碗低分既越南生牛肉河。

牛腩都係要求牛腩夠淋夠入味同咖喱夠香濃夠杰,呢個一睇就知水汪汪唔夠杰,食落咖喱唔夠香濃兼牛腩煮得唔夠火喉又唔入味。
一個唔掂既咖喱,攪到連個蒜蓉包本來想配喱食都冇心機食。
小食既牛油雞翼上檯時幾香牛油味,心諗今餐終於有亮點。雞翼咬落去雖唔算乾有肉汁,但幾乎食唔到牛油味,明明咁香牛油味但食落又係另一回事,真係令人好難理解。

老店會退步其實唔出奇,老師傅退下火線而新人又未完全跟得上水準,出品自然會差左,但水準去到咁既地步令人難以理解。不過都希望過一排水準可以回復,因為香港既老牌越南菜選擇實在唔多,少一間就少一個選擇。
 
老趙越南餐廳
地址:佐敦文苑街25-27號地下
Tel : 2384 2143

0 意見:

張貼留言