迷你.黑洞

Happiness Real only when shared.

麻甩點心聚 : 陳師傅點心專門店


麻甩佬飯聚通常都係個一兩味,唔係小菜大排檔就打邊爐,今次玩新意晚飯時份飲夜茶。
呢度裝修都正路舒服,一邊牆重有個大壽桃裝飾。
叫左茶先睇點心紙,除左點心之外都係蒸飯之類,第一轉先叫金牌蝦餃、山竹牛肉球、醬皇蒸鳳爪、懷舊糯米雞、陳皮牛肉腸板燒煎釀茄子、咖喱土魷及炸蜆介鯪魚球

金牌蝦餃夠大粒落足料味道可以,但山竹牛肉球食落口感比較淋。
醬皇蒸鳳爪既鳳爪吸收曬醬汁夠入味、懷舊糯米雞打開個樣麻麻地,可能因為蒸既時候反轉左,食落都可以只係飯粒濕左少少。
陳皮牛肉腸就冇乜陳皮味反而有芫茜味,板燒煎釀茄子入口夠軟淋又非常熱燙。
咖喱土魷不過不失,炸蜆介鯪魚球都彈牙但可以炸得更香口。
第二轉叫左店家推介既脆皮銀絲腸、自己想試既黑椒金錢肚食友想試既魚籽燒賣皇及港式綿花雞,再加兩個炸物既千絲芋角及甘筍咸水角。
脆皮銀絲腸食落外滑內脆,黑椒金錢肚都幾淋及入味。
魚籽燒賣皇都係一口肉感唔算特別,港式綿花雞既魚肚吸收曬雞汁後當然好食,所以食到最後只見雞不見綿花。
甘筍咸水角外層香脆味道正路,千絲芋角既芋蓉幾幼滑值得試。
飲夜茶都幾舒服,冇日頭咁多人,又唔會因食晏時間得一個鐘而要趕頭趕命,不過飲夜茶都只係偶一為之下次麻甩飯聚應該回歸小菜懷抱

陳師傅點心專門店
地址:尖沙咀金馬倫道56號號地下
Tel : 9182 2528

0 意見:

張貼留言