迷你.黑洞

Happiness Real only when shared.

[澳洲.塔斯曼尼亞] 澳洲新婚之旅(Day 8)


到達塔斯曼尼亞既第二日,今日要係Hobert出現,因為逢星期六既 Hobert Salmasca Market係必去既地方,我地都係因為呢個market所以先趕住要黎Tasmania。市集朝早9:00就開始,我地大概10:00去到。Caravan park果度係有接駁車去市集,只係好似要$18兩人來回,覺得有d貴,所以決定揸車去搏下搵車位,點知好快就搵到﹐其實車位唔少,最多泊遠少少行去市集。
市集都真係幾大,仔細咁行可能要個幾兩個鐘,個日重咁啱有慈善車展,有好多靚車同古董車睇,愛車既人應該會睇得好開心,因為可以近咁距離睇到呢d重識行識走既好野。



呢架車叫佢做古董,都應該唔足以形容佢有幾古舊,因為場內有太多比呢架後生幾十年既古董車,重要個內籠同機器都好靚仔,真係難得。
另外都有唔少手工藝品,但我地對工藝品同衣服類都唔係太大興趣,所以都係以食野為主,一開始揀左一檔熱狗買泥當早餐,因為呢檔都幾多人幫襯。基本上所有舖頭既熱狗都係賣$5,成個市集好似得三四檔淨係賣熱狗既,我地就食左兩間。
 
第一間有四款唔同既腸可以選擇,有中文餐牌添,我地揀左最下面果款咖喱腸,咖喱腸都幾好味,大路肉腸味,可以免費配洋蔥,但係個飽太硬。
 
第二間係黑色裝潢的,得兩款腸可以揀,同樣可以配洋蔥,牛肉腸肉味好濃,裡面有香草,鬆弛話好似食緊扒咁,而且個麵包無頭先第一間咁硬,鍾意食牛肉腸既臨走最好買多一隻,因為離開左可能食唔番。
 
有檔特別d既賣炸菇菇。成個市集得一間賣炸物,寫住Tasmania Mushroom Tempura,一客$7,個脆漿都炸得幾酥脆,d粉一的都唔厚,而且唔覺太油,菇菇肉厚多汁,都幾好味,而且$7都幾大碟,值得一試。
離開Hobert會向東行,今日會晌St Helens停留,途中天氣唔錯,唔知黠解見到個咁既景色,就諗起一句"八千里路雲和月",好在我唔使揸八千里。
首先去左途中一個叫Katy's Berry Farm既地方,呢度有Trip Advisor推介,本來以為果度有新鮮既草莓可以食,點知只係得各款莓既醬,係網上面都見到佢話有scone,但係兩個Scone加cream加醬賣$10.5又好似太貴,所以最後無食到。果度既餐牌有中文字,我諗都幾多中國人去,同埋當造期應該會有草莓可以摘,不過呢度摘草莓其實都幾貴,都係覺得去超級市場買簡單d。
跟住再沿著A3公路北上,去左一個叫Freycinet Marine Farm既地方,晌網上面有唔少評論話呢度既生蠔勁好食。
 
可能我地岩岩係季尾,所以生蠔唔算好肥,但的確係新鮮,一打都只係$15,最後我地食左三打,又買走左一d的帶子今晚煮,一包250g要$11,其實都有興趣買呢度既青口,1kg只係$10,不過尋晚已經食過所以遅d先再食。
今日過夜既caravan park晌St Helens,個park都幾大,地方多到可以自己係車尾煮野食,再開檯橩開餐都冇難度。室內果個camper kitchen都比尋晚果間大好多,仲有室內BBQ爐添。
今次我地揀左個位就係晌廁所隔離,因為尋晚既經驗,响凌晨時間出面係超凍,如果要去沖涼去廁所,真係一個挑戰,甚至可以話係壯舉,所以都係越近廁所越好。
係車尾扮完魚蝦蟹洗完菜切下野,都係入番室內煮食方便d。夜晚果餐我地晌超市買左d的煙肉、牛油、洋蔥同意粉黎煮,仲煮埋我地頭先食蠔後順手買返黎既帶子,重有少量生果同飲品,加埋都大約廿幾蚊,都算係平價之選。
今次呢個St Helens Big 4 Caravan Park非常之好,因為果個沖涼既熱水係無限時架!!!無限時之餘仲要係水力猛既,所以沖涼沖得好開心。Big 4介紹既似乎真係比較好,起碼沖涼個陣唔使好似打仗咁緊張先。

Hobert Salamanca Saturday Market
Salamanca Place, Hobart's picturesque waterfront, every Saturday 8:30am to 3:00pm

Katy's Berry Farm
12 Addison St, Swansea TAS

Freycinet Marine Farm
1784 Coles Bay Rd, Coles Bay TAS

St Helens Big 4 Caravan Park
2 Penelope Street St Helens TAS

更多最新的飲食資訊在我的Facebook page,請給我一個’LIKE'吧! 

0 意見:

張貼留言