迷你.黑洞

Happiness Real only when shared.

[澳洲.布里斯班] 澳洲新婚之旅(Day 1 & 2)

這個澳洲之旅其實已是2012年尾的事,因為日常工作,加上有很多東西等著要寫,所以才不了了之,終於抽到一點時間可以寫了。由於是第一次去澳洲,所以這次盡量去多一點地方如布里斯班、悉尼、塔斯曼尼亞、墨爾本等等,因為下次再來不知會是何年何月。 

首先從香港飛去第一站的布里斯班,在那裡逗留三日兩夜,之後飛去悉尼玩四日三夜,離開便轉戰塔斯曼尼亞作六日五夜的駕車和睡車的環島遊,最後再飛去墨爾本再玩四日三夜。
我們用Asia Miles換了Cathay的來回機票,內陸機就坐了三程,但兩程其實是從Asia Miles換機票時包括在內,所以只用錢買了一程內陸機,才可實現今次的旅程。Asia Miles一向有包兩程內陸機,不過不是所有內陸機都包,他們是有距離限制,好像我們其中有一程由悉尼飛塔斯曼尼亞,那一程飛機就是自己買的,因為Asia Miles那邊說距離超過了,要再加里數才能換。
去程機是通宵直航機,因為只顧著訓,對食物也沒甚要求 記憶中味道還可以,畢竟人家坐長途機,付的機票也較高,食品也不能太差吧。

第一天到埗由機場到市區可以坐Airtrain,單程一人$15,20分鐘就到市區,因為我們落機時間比較夜,所以我地揀左搭door to door既小巴,由機場直接到酒店門口,回程由酒店pick up返機場。單程兩人$30,來回兩人$54,間公司叫con-x-ion,如果在網上訂位要先俾錢,再收2%信用咭手續費,我們那天無訂位只是walk-in,幸好都有空位。
到Brisbane一定要買go card,本來晌網上見有人話go card要退還攞$5 deposit好煩,所以無買,點知網上所講既咩daily pass,return ticket已經全部無晒,一係買單程,一係買go card,以去Gold Coast為例,單程一人$16,用go card $10.99,如果off peak(早上九點後三點前同七點後,星期六日全日)就只係around $8,幾乎平一半。

拎返訂金既手續已經簡單化左,同退八達通無分別,但好似唔係個個站都可以咁做,可以去translink.au果度check下邊度可以。仲有就係上落車都要"嘟咭",我地有一程好似上車"嘟"唔到, 結果落車果陣扣多左錢。

後來發現go card係有尾程優惠,張咭本身有$5按金,最後一程去機場大約要$15,未入閘之前我地張咭大約有$3~$5蚊,晌機場出閘負左大約$12蚊,連同我地果$5訂金,都賺左大約$7架,如果計數計得好,仲可以賺多d,但要記住每次增值go card至少要$5。
布里斯班住的地方是iStay River City,成個旅程最貴係呢間,$1014港幣一晚。
本來我地訂one room apartment,到埗邊左two rooms,大到無倫之餘,有個可以放到兩張麻雀檯既露台。地理位置不俗,近central station,大概行8-10分鐘,附近有便利店。唯一缺點係無沖涼洗頭既野,全部要自備。
  
放好行李後,就去了附近一家24小時pancake shop宵夜,這家店都幾出名,而且24小時,幾時覺得肚餓都可以去食。地點就晌Charlotte Street與George Street交界,近Central Station好易搵。
我地叫左一個classic pancake(大約$22)同一份2塊既傳統pancake加雪糕(大約$8),就算不是以宵夜,以正餐來講也非常之大,特別是Classic,有菠蘿、香蕉、蛋,堆到好似一座山。這裡的pancake太多澱粉質,飽到癲也吃不完,幸好味道都唔錯。
而且間pancake shop其實開晌教堂裡面,建築本身都好靚,都好得值得去睇。
 
 日頭由我們的公寓酒店往外看,其實風景唔錯,感覺很開揚,這種情景在香港不易找到。
周日晌Eagle Street有weekend market,market沿河邊一直伸廷,還可見到碼頭和觀光船,不過規模唔大,一陣就行完。最後經過公園,見到紫色的花樹,不肯定是什麼花,但開得很燦爛。
晌網上面有好多人提到晌Central Station附近,有間壽司店成日大排長龍,應該叫R Sushi,晌Starbucks隔兩三個舖位,當日唔太多人,所以買左三個。澳洲人似乎好鍾意食呢種壽司卷,近來晌香港也有開類似既壽司卷店,不過價錢好貴。
壽司卷大概有十幾種口味,顏色好靚,AUS$2.5~$2.8不等,正常人應該吃兩個已經好飽,都不失為早餐之選,味道唔錯,但係我嫌米飯硬左少少。
帶手卷上去Gold Coast既火車,當做早餐食就岩岩好,方便又快捷,趕車的話是好選擇。 
坦白講Gold Coast如果唔去主題公園,其實都真係無咩好睇,加上又唔打算游水同玩沙....淨係晌度睇海鷗...都係走去醫肚最實際。
下午茶去左一間叫BMD Northcliffe Surf Life Saving Supporters Club,晌Surfers Paradise,果個Tripadvisors既評語幾好所以去,不過唔近中間既Beach Road,要步行10-15分鐘。
因為這裡是會所,所以入場要登記,其實都只是簡單填名字、地址和簽個名就可以。下午茶叫左一個burger(大約Aus$16)Share,都幾好食,牛肉有肉汁,肉味又濃,又有海景睇,夫復何求?
夜晚去左酒店附近的一間韓國菜Obaltan Korean BBQ Cuisine,在Central Station附近有好多韓國菜館,叫左兩個辣湯都係大約廿幾蚊。
  
辣湯味道只是一般,感覺是香港的會好一點,但因為唔想旅程一開始就吃太多西餐,所以在有選擇的情況下一試無妨。可能人家定位是BBQ,吃BBQ應該好d吧?但在下筆時看到網頁資料說已關門,有點可惜。
最後在回程途中,經過超市時買左木瓜和菠蘿回酒店,澳洲都係生果大國,本地出產的生果都又平又鮮甜,有機會去超市就不要錯過。




~By 鬆弛~

iStay River City
地址: 79 Albert St, Brisbane QLD 4000 Aus
電話:+61 1300 766 558

Pancake Manor (24 hours)
地址: 18 Charlotte St, Brisbane QLD 4000 Aus
電話:+61 7 3221 6433

R Sushi

 地址: 26 Felix St Brisbane City 4000 Aus

BMD Northcliffe Surf Life Saving Supporters Club
地址:Cnr Garfield Terrace & Thornton Street, Surfers Paradise, Queensland 4217
電話: (07) 5539 8091

Obaltan Korean BBQ Cuisine(Closed)
地址: 91 Elizabeth St, Brisbane QLD 4000 Aus
電話:+61 7 3211 1469

更多最新的飲食資訊在我的Facebook page,請給我一個’LIKE'吧! 

0 意見:

張貼留言